వెనెజువెలాలో ఏం జరిగింది?.. కీల‌క అవయవాలు లేకుండా తిరిగొచ్చిన భారత నావికుడి మృతదేహం!

విదేశంలో ఉద్యోగం చేస్తూ మరణించిన తమ కుమారుడి మృతదేహాన్ని చూసి ఆ కుటుంబం కకావికలమైంది. దేహంలో కీలకమైన అంతర్గత అవయవాలు ఏవీ లేకుండా ఖాళీగా అప్పగించడంతో వారు తీవ్ర దిగ్భ్రాంతికి గురయ్యారు. ఈ అమానవీయ ఘటనపై సమగ్ర దర్యాప్తు జరిపి తమకు న్యాయం చేయాలని బాధిత కుటుంబం ప్రభుత్వాన్ని కోరుతోంది. ఉత్తరప్రదేశ్‌లోని దేవరియా జిల్లాకు చెందిన రాకేశ్ చౌహాన్ (33) కథ ఇది.

వివరాల్లోకి వెళితే... దేవరియా జిల్లా, లగ్డా బజార్ టోలాకు చెందిన రాకేశ్ చౌహాన్.. వెనెజువెలాలో 'ఎక్స్‌ఫినిటీ' అనే కంపెనీకి చెందిన మర్చంట్ నౌకలో నావికుడిగా పనిచేస్తున్నాడు. ఈ ఏడాది మే నెలలో ఓడలో కిందపడి గాయపడ్డాడని, తర్వాత గుండెపోటుతో మరణించాడని కంపెనీ కుటుంబ సభ్యులకు సమాచారం ఇచ్చింది. దాదాపు నెల రోజుల తర్వాత జూన్ 4న రాకేశ్ మృతదేహం స్వగ్రామానికి చేరింది. అయితే, మృతదేహంపై ఉన్న కుట్లు చూసి కుటుంబ సభ్యులకు అనుమానం వచ్చింది.

దీంతో జిల్లా మేజిస్ట్రేట్ ఆదేశాల మేరకు దేవరియాలో మృతదేహానికి పోస్టుమార్టం నిర్వహించారు. ఆ నివేదికలో షాకింగ్ విషయాలు బయటపడ్డాయి. రాకేశ్ శరీరం నుంచి మెదడు, గుండె, రెండు ఊపిరితిత్తులు, కాలేయం, కిడ్నీలు, ప్లీహం, క్లోమం, కడుపు, ప్రేగులతో పాటు దాదాపు అన్ని ప్రధాన అంతర్గత అవయవాలను తొలగించినట్లు వైద్యులు నిర్ధారించారు. మెడ నుంచి కింద వరకు 22 కుట్లు, ఒక చెవి నుంచి మరో చెవి వరకు 21 కుట్లు ఉన్నాయని, శరీరాన్ని డీప్ ఫ్రీజ్‌లో ఉంచారని తెలిపారు. కీలక అవయవాలు లేకపోవడంతో మరణానికి కచ్చితమైన కారణాన్ని నిర్ధారించలేమని వైద్యులు స్ప‌ష్టం చేశారు.

ఈ ఘటనపై ఫెడరేషన్ ఆఫ్ సీఫేరర్స్ యూనియన్స్ ఆఫ్ ఇండియా (ఎఫ్ఎస్‌యూఐ) తీవ్ర ఆగ్రహం వ్యక్తం చేసింది. "ఇది ఏమాత్రం ఆమోదయోగ్యం కాదు. నావికులు బలిపశువులు అవుతున్నారు" అని పేర్కొంది. వెనెజువెలాలోని భారత రాయబార కార్యాలయం జోక్యం చేసుకుని, పూర్తి ఆటోప్సీ నివేదికను తెప్పించాలని, మరణానికి గల కారణాలను వెలికితీయాలని, బాధిత కుటుంబానికి న్యాయం, నష్టపరిహారం ఇప్పించాలని డిమాండ్ చేసింది.

"మమ్మల్ని పూర్తిగా చీకట్లో ఉంచారు. నా కొడుకు మరణంపై కంపెనీపై చర్యలు తీసుకుని, ప్రభుత్వం సమగ్ర విచారణ జరపాలి" అని రాకేశ్ తండ్రి రామ్ దేవ్ చౌహాన్ ఆవేదన వ్యక్తం చేశారు. ఈ దారుణమైన ఆరోపణలపై వెనెజువెలా అధికారులు గానీ, షిప్పింగ్ కంపెనీ గానీ ఇప్పటివరకు స్పందించకపోవడం గమనార్హం. ఈ ఘటన విదేశాల్లో పనిచేస్తున్న భారత నావికుల భద్రతపై తీవ్ర ఆందోళనలను రేకెత్తిస్తోంది.