హెచ్‌-1బీ భారతీయులకు భారీ ఊరట.. అమెరికాలో బర్త్‌రైట్ సిటిజన్‌షిప్‌పై సుప్రీంకోర్టు చారిత్రాత్మక తీర్పు

అమెరికాలో నివసిస్తున్న లక్షలాది మంది వలసదారులకు, ముఖ్యంగా హెచ్‌-1బీ వీసాలపై ఉన్న భారతీయులకు భారీ ఊరట లభించింది. అమెరికా గడ్డపై జన్మించిన వారికి సంక్రమించే ‘జన్మతః పౌరసత్వాన్ని’ (బర్త్‌రైట్ సిటిజన్‌షిప్) నియంత్రించేందుకు గతంలో జారీ చేసిన ఎగ్జిక్యూటివ్ ఆర్డర్‌ను ఆ దేశ అత్యున్నత న్యాయస్థానం కొట్టివేసింది. ఈ తీర్పు ఫలితంగా, అమెరికాలో జన్మించిన పిల్లలకు వారి తల్లిదండ్రుల వీసా హోదాతో సంబంధం లేకుండా పౌరసత్వం లభించే ప్రక్రియ యథాతథంగా కొనసాగనుంది.

అమెరికా రాజ్యాంగంలోని 14వ సవరణ ప్రకారం, ఆ దేశ భూభాగంలో జన్మించిన ప్రతి ఒక్కరూ సహజసిద్ధంగా పౌరులేనని చీఫ్ జస్టిస్ జాన్ రాబర్ట్స్ నేతృత్వంలోని ధర్మాసనం స్పష్టం చేసింది. వలసదారులు లేదా తాత్కాలిక వీసాలపై ఉన్నవారి సంతానాన్ని ఈ నిబంధన నుంచి మినహాయించలేమని న్యాయస్థానం తేల్చిచెప్పింది. శతాబ్దానికి పైగా కొనసాగుతున్న చట్టపరమైన సంప్రదాయాన్ని ఈ తీర్పు ద్వారా సుప్రీంకోర్టు పునరుద్ఘాటించింది.

ఈ చారిత్రాత్మక తీర్పు హెచ్‌-1బీ వీసాలపై అమెరికాలో విధులు నిర్వహిస్తున్న సుమారు 3 లక్షల మంది భారతీయులకు గొప్ప ఊరటనిచ్చింది. గ్రీన్ కార్డ్‌ల కోసం దశాబ్దాల తరబడి నిరీక్షిస్తున్న వేలాది భారతీయ కుటుంబాల పిల్లలకు ఈ నిర్ణయం భద్రతను కల్పిస్తుంది. ఇకపై వారి పిల్లలు అమెరికా పౌరులుగా పూర్తిస్థాయి హక్కులను పొందే అవకాశం ఉంటుంది.

సుప్రీంకోర్టు వెలువరించిన ఈ తీర్పుపై భారతీయ అమెరికన్ నేతలు హర్షం వ్యక్తం చేశారు. ఇది వలస కుటుంబాలకు లభించిన గొప్ప భరోసా అని ‘ఇండియన్ అమెరికన్ ఇంపాక్ట్’ ఎగ్జిక్యూటివ్ డైరెక్టర్ చింతన్ పటేల్ పేర్కొన్నారు. రాజ్యాంగం ప్రకారం పౌరసత్వ నిబంధనల్లో ఎలాంటి మినహాయింపులకు తావులేదని కాంగ్రెస్ సభ్యురాలు ప్రమీలా జయపాల్ స్పష్టం చేశారు.

మరోవైపు, ఈ తీర్పు దేశ ప్రయోజనాలకు విరుద్ధమని డొనాల్డ్ ట్రంప్ వ్యాఖ్యానించారు. ఈ అంశాన్ని చట్టసభల ద్వారా పరిష్కరించవచ్చని ఆయన అభిప్రాయపడ్డారు. అయితే, సుప్రీంకోర్టు రాజ్యాంగబద్ధమైన వివరణ ఇచ్చిన నేపథ్యంలో, చట్టపరమైన మార్పులు చేయడం అంత సులభం కాదని న్యాయ నిపుణులు విశ్లేషిస్తున్నారు.