టీమిండియాతో మొదటి మ్యాచ్.. ఇంగ్లండ్ జట్టులో రెండు మార్పులు

భారత్‌తో జరగబోయే తొలి టీ20 అంతర్జాతీయ మ్యాచ్‌ కోసం ఇంగ్లండ్ తమ తుది జట్టును ప్రకటించింది. డర్హమ్‌లోని చెస్టర్-లీ-స్ట్రీట్ వేదికగా నేడు (బుధవారం) జరగనున్న ఈ మ్యాచ్‌ కోసం ఇంగ్లండ్ జట్టులో కీలక మార్పులు చోటుచేసుకున్నాయి. 2026 టీ20 ప్రపంచకప్ సెమీఫైనల్స్‌లో భారత్ చేతిలో ఓడిపోయిన జట్టుతో పోలిస్తే.. ఈసారి ఇంగ్లండ్ రెండు మార్పులు చేసింది. గాయాల నుంచి కోలుకుని ఇటీవలే న్యూజిలాండ్‌తో టెస్ట్ సిరీస్ ఆడిన ఫాస్ట్ బౌలర్లు జోఫ్రా ఆర్చర్, జోష్ టంగ్‌కు  విశ్రాంతి కల్పించారు. ఆర్చర్ స్థానంలో ల్యూక్ వుడ్, అలాగే జేమీ ఓవర్టన్ స్థానంలో సాకిబ్ మహమూద్ జట్టులోకి వచ్చారు. టీ20 ప్రపంచకప్‌లో జట్టును సెమీస్ వరకు నడిపించిన 26 ఏళ్ల హ్యారీ బ్రూక్ ఈ సిరీస్‌లో కెప్టెన్‌గా ఇంగ్లండ్‌ను ముందుండి నడిపించనున్నాడు.

ఐపీఎల్, పీఎస్ఎల్‌లకు దూరం: కెప్టెన్ హ్యారీ బ్రూక్
సిరీస్ ప్రారంభానికి ముందు ఇంగ్లండ్ కెప్టెన్ హ్యారీ బ్రూక్ అంతర్జాతీయ క్రికెట్ పట్ల తనకున్న నిబద్ధతను చాటుకున్నాడు. ఇంగ్లండ్ జట్టుకు ప్రాతినిధ్యం వహించడమే తన మొదటి ప్రాధాన్యమని, అందుకే తాను ఐపీఎల్, పీఎస్ఎల్ వంటి ఫ్రాంచైజీ లీగ్‌లకు దూరంగా ఉంటున్నానని స్పష్టం చేశాడు. 'ది హండ్రెడ్' మినహా మరే ఇతర ఫ్రాంచైజీ క్రికెట్ ఆడకూడదని నిర్ణయించుకున్నట్లు బ్రూక్ తెలిపాడు.

మైదానంలోనైనా, వెలుపలైనా తాను చేసే ప్రతి పని ఇంగ్లండ్ తరఫున అత్యుత్తమంగా రాణించడం కోసమేనని చెప్పాడు. ఫ్రాంచైజీ లీగ్‌లు ఆడకపోవడం వల్ల లభించే విరామ సమయాన్ని తన శారీరక దృఢత్వంపై దృష్టి పెట్టడానికి ఉపయోగిస్తానని, తద్వారా మూడు ఫార్మాట్లలోనూ దేశానికి ఆడాలనే తన చిన్ననాటి కల నెరవేరుతుందని బ్రూక్ పేర్కొన్నాడు. భవిష్యత్తులో ఇంగ్లండ్ టెస్ట్ కెప్టెన్సీ రేసులో తన పేరు వినిపించడంపై స్పందిస్తూ.. తాను కెప్టెన్ అయినా కాకపోయినా, దేశం తరఫున క్రికెట్ ఆడుతుండటం కంటే తనకు మరేదీ సంతోషాన్ని ఇవ్వదని తేల్చిచెప్పాడు.

ఇంగ్లండ్ తుది జట్టు 
ఫిల్ సాల్ట్, జోస్ బట్లర్, హ్యారీ బ్రూక్ (కెప్టెన్), జాకబ్ బెథెల్, టామ్ బాంటన్, సామ్ కరన్, విల్ జాక్స్, లియామ్ డాసన్, సాకిబ్ మహమూద్, ఆదిల్ రషీద్, ల్యూక్ వుడ్.