భారత్-అమెరికా చారిత్రక వాణిజ్య ఒప్పందం.. తుది అంకానికి చర్చలు
- చర్చలు 99 శాతం విజయవంతంగా పూర్తి
- చివరి ఒక శాతంపైనే ప్రస్తుతం కసరత్తు
- ఇరు దేశాల దౌత్యంలో కీలక ముందడుగు
- పీటీఏజీ ప్రతినిధి సెర్గియో గోర్ వెల్లడి
అమెరికాలో జరిగిన ఒక ఉన్నత స్థాయి సమావేశంలో ఆయన మాట్లాడుతూ.. భారత్తో వాణిజ్య బంధాన్ని మరింత బలోపేతం చేసుకోవడానికి డొనాల్డ్ ట్రంప్ ప్రభుత్వం అత్యంత ప్రాధాన్యం ఇస్తోందని స్పష్టం చేశారు. "మేము భారత్తో ఒప్పందానికి చాలా దగ్గరగా ఉన్నాము. చర్చలు దాదాపు ముగింపు దశకు వచ్చాయి. చివరి ఒక శాతం అంశాలను కూడా ఇరు దేశాల ప్రయోజనాలకు అనుగుణంగా త్వరలోనే కొలిక్కి తెస్తాం" అని గోర్ ధీమా వ్యక్తం చేశారు.
ఈ వాణిజ్య ఒప్పందం ద్వారా ఇరు దేశాల మధ్య ఎగుమతులు, దిగుమతులు మరింత సులభతరం కానున్నాయి. ముఖ్యంగా సాంకేతికత, రక్షణ, వ్యవసాయం, కీలకమైన ఇంధన రంగాలలో పరస్పర సహకారం పెరగడానికి ఈ డీల్ దోహదపడుతుందని నిపుణులు భావిస్తున్నారు. గత కొన్నేళ్లుగా ఇరు దేశాల దౌత్యవేత్తలు, వాణిజ్య ప్రతినిధులు జరిపిన నిరంతర చర్చల ఫలితంగానే ఈ పురోగతి సాధ్యమైందని పీటీఏజీ వర్గాలు పేర్కొన్నాయి.
అమెరికాలో కొత్త ప్రభుత్వం బాధ్యతలు చేపట్టిన తర్వాత భారత్తో వ్యూహాత్మక భాగస్వామ్యాన్ని మరింత ముందుకు తీసుకెళ్లడంలో ఈ ఒప్పందం అత్యంత కీలకమైనదిగా మారనుంది. మిగిలివున్న ఆ చివరి ఒక శాతం అంశాలపై ఇరు పక్షాలు ఏకాభిప్రాయానికి వస్తే, అతి త్వరలోనే ఇరు దేశాల అగ్రనేతల సమక్షంలో ఈ మెగా ట్రేడ్ డీల్పై అధికారికంగా సంతకాలు జరిగే అవకాశం ఉంది. ఈ ఒప్పందం పూర్తయితే ఆసియా-పసిఫిక్ ప్రాంతంలోనే కాకుండా ప్రపంచ ఆర్థిక వ్యవస్థలోనూ సరికొత్త మార్పులు వస్తాయని విశ్లేషకులు అంచనా వేస్తున్నారు.
