వైభవ్ సూర్యవంశీ అరంగేట్రంపై ఉత్కంఠ.. తుది జట్టులో చోటెలా?

భారత క్రికెట్‌లో సంచలనంగా మారిన 15 ఏళ్ల యువ కెరటం వైభవ్ సూర్యవంశీ అంతర్జాతీయ అరంగేట్రం కోసం అభిమానులు ఆసక్తిగా ఎదురుచూస్తున్నారు. అయితే, ఐర్లాండ్‌తో నేడు జరగనున్న తొలి టీ20 మ్యాచ్‌లో అతనికి చోటు దక్కడంపై ఉత్కంఠ నెలకొంది. ప్రస్తుతం అద్భుతంగా రాణిస్తున్న ఆటగాడిని పక్కనపెట్టి వైభవ్‌కు అవకాశం ఇవ్వడం సరికాదని టీమ్ మేనేజ్‌మెంట్ భావిస్తుండటమే దీనికి కారణం. దీంతో అతని అరంగేట్రం ఆలస్యమయ్యే సూచనలు కనిపిస్తున్నాయి.

ఒకవేళ ఈ మ్యాచ్‌లో వైభవ్ బరిలోకి దిగితే, భారత్ తరఫున అంతర్జాతీయ క్రికెట్ ఆడిన అత్యంత పిన్న వయస్కుడిగా చారిత్రక రికార్డు సృష్టిస్తాడు. ఐపీఎల్ 2026 సీజన్‌తో పాటు దేశవాళీ, వయో విభాగాల టోర్నీలలో తన నిర్భయమైన బ్యాటింగ్‌తో వైభవ్ అందరి దృష్టిని ఆకర్షించాడు. అయితే, ఇటీవలే రెండోసారి టీ20 ప్రపంచకప్ గెలిచి పటిష్టంగా ఉన్న భారత జట్టులోకి అతన్ని తీసుకోవడం కొత్త కెప్టెన్ శ్రేయస్ అయ్యర్, హెడ్ కోచ్ గౌతమ్ గంభీర్‌కు కత్తిమీద సాములా మారింది.

ఈ విషయంపై మ్యాచ్‌కు ముందు జరిగిన మీడియా సమావేశంలో భారత బ్యాటింగ్ కోచ్ సితాన్షు కోటక్ స్పష్టత ఇచ్చాడు. "వైభవ్ చాలా ప్రతిభావంతుడు, అందులో ఎలాంటి సందేహం లేదు. ఐపీఎల్‌లో జోఫ్రా ఆర్చర్ వంటి ప్రపంచస్థాయి బౌలర్లను ఎదుర్కొన్న తీరు చూస్తే అతనిలో సహజసిద్ధమైన నైపుణ్యాలు పుష్కలంగా ఉన్నాయని అర్థమవుతుంది. అతను కచ్చితంగా ఒక అసాధారణమైన టాలెంట్" అని కోటక్ ప్రశంసించాడు.

అదే సమయంలో జట్టు ఎంపికలోని సంక్లిష్టతను వివరిస్తూ.. "ఈ రోజు సాయంత్రం కెప్టెన్, హెడ్ కోచ్ తుది జట్టుపై నిర్ణయం తీసుకుంటారు. అతనికి ఆడే అవకాశం వస్తే సంతోషమే. ఒకవేళ రాకపోయినా ఫర్వాలేదు, ఎందుకంటే అతను భారత జట్టులో భాగమయ్యాడు. అతనికి తగిన అవకాశాలు భవిష్యత్తులో తప్పకుండా వస్తాయి. ఒకరికి అవకాశం ఇవ్వడం కోసం, ఇప్పటికే పరుగులు చేస్తూ రాణిస్తున్న మరొకరిని తప్పించడం సరైన విధానం కాదు. ఒకరికి అవకాశం కల్పించడం, మరొకరికి అన్యాయం చేయడం మధ్య చాలా సున్నితమైన రేఖ ఉంటుంది. దానిని మేము గౌరవించాలి" అని తెలిపాడు. 

భారత్‌లో ప్రతిభకు కొదవలేదని, అందుకే సెలక్టర్లకు కూడా జట్టు ఎంపిక తలనొప్పిగా మారుతుందని కోటక్ అభిప్రాయపడ్డాడు. "ఫామ్‌లో ఉండి, జట్టుకు విజయాలు అందిస్తున్న ఆటగాళ్లను ఎప్పటికీ విస్మరించకూడదు. బీసీసీఐ వ్యవస్థ వల్ల కొత్త ఆటగాళ్లు వస్తూనే ఉంటారు" అని వివరించాడు. వైభవ్ వంటి యువ ఆటగాడి విషయంలో ప్రత్యేక శ్రద్ధ తీసుకుంటున్నామని, అతను జట్టులో స్వేచ్ఛగా, సౌకర్యంగా ఉండేలా చూస్తున్నామని తెలిపాడు. "నువ్వు సొంత జట్టుకు ఆడుతున్నట్లే భావించు. నీకు ఏమనిపిస్తే అది స్వేచ్ఛగా పంచుకో అని గంభీర్ కూడా అతనికి చెప్పాడు" అని కోటక్ పేర్కొన్నాడు.