ఒక కప్పు బఠానీలు.. అన్నాన్ని ఫైబర్ పవర్‌హౌస్‌గా మార్చేస్తాయి!

మన రోజువారీ ఆహారంలో ఎక్కువగా కనిపించే పోషక లోపాల్లో ఫైబర్ ఒకటి. జీర్ణక్రియ సక్రమంగా సాగడం, గట్ ఆరోగ్యం మెరుగుపడడం, రక్తంలో చక్కెర స్థాయులు నియంత్రణలో ఉండడం, ఎక్కువసేపు కడుపు నిండిన భావన కలగడం వంటి అనేక ప్రయోజనాలకు ఫైబర్ కీలకం. అయినప్పటికీ చాలామంది అవసరమైనంత ఫైబర్‌ను తీసుకోవడం లేదు.

అయితే ఫైబర్ పెంచుకోవడానికి ఆహారపు అలవాట్లను పూర్తిగా మార్చాల్సిన అవసరం లేదని పోషకాహార నిపుణులు చెబుతున్నారు. ఒక చిన్న మార్పు రోజువారీ భోజనాన్ని మరింత పోషకమయంగా మార్చగలదని చెబుతున్నారు.

అన్నంలో బఠానీలు
సాధారణంగా తినే అన్నంలో ఒక కప్పు పచ్చి బఠానీలు కలిపితే ఆ భోజనంలో దాదాపు 10 గ్రాముల ఫైబర్, 8.6 గ్రాముల ప్రొటీన్ లభిస్తాయని నిపుణులు తెలిపారు. దీంతో ఎక్కువసేపు ఆకలి వేయకుండా ఉండటమే కాకుండా రక్తంలో చక్కెర స్థాయులు కూడా స్థిరంగా ఉండేందుకు సాయపడుతుంది.

అంతేకాదు, గట్ ఆరోగ్యం మెరుగుపడటంలో కూడా ఈ అలవాటు ఉపయోగపడుతుందని ఆమె వివరించారు. తాజా బఠానీలు అందుబాటులో లేకపోతే ఫ్రోజన్ బఠానీలు కూడా ఉపయోగించవచ్చని సూచించారు.

రోజువారీ ఆహారంలో ఫైబర్ పెంచుకోవాలంటే..
తెల్ల బియ్యం, మైదా పదార్థాల బదులు బ్రౌన్ రైస్, మల్టీగ్రెయిన్ లేదా పప్పు ధాన్యాలను ఎంచుకోవాలి. శనగలు, పెసర్లు, మినుములు, రాజ్మా వంటి వాటిని కూరలు, సలాడ్లలో చేర్చాలి. ఓట్స్, చియా గింజలు, పండ్లతో కూడిన అల్పాహారం తీసుకోవడం మంచిది. యాపిల్, పియర్ వంటి పండ్లను తొక్కతోనే తినడం, బాదం, పిస్తా వంటి డ్రైఫ్రూట్స్‌ను మధ్యాహ్నం స్నాక్స్‌గా తీసుకోవడం ఉపయోగకరంగా ఉంటుంది.

చిన్న మార్పు.. పెద్ద ప్రయోజనం
ఆరోగ్యకరమైన ఆహారం అంటే ఖరీదైన పదార్థాలు తినాల్సిన అవసరం లేదు. రోజూ తినే అన్నంలో ఒక కప్పు బఠానీలు కలపడం వంటి చిన్న మార్పు కూడా ఫైబర్, ప్రొటీన్ పరంగా పెద్ద లాభాన్ని అందించగలదు. గట్‌ హెల్త్‌ నుంచి బరువు నియంత్రణ వరకు అనేక ప్రయోజనాలు పొందాలంటే ఈ సులభమైన అలవాటును ఆహారంలో భాగం చేసుకోవచ్చు.