ప్రసంగం మధ్యలో భార్య ఫోన్.. స్పీచ్ ఆపి మాట్లాడిన సునీల్ గవాస్కర్.. వీడియో ఇదిగో!

భారత క్రికెట్ దిగ్గజం, మాజీ కెప్టెన్ సునీల్ గవాస్కర్ మైదానంలో ఎంతటి మొండి ఘటాలనైనా, ప్రమాదకరమైన బౌలర్లనైనా హెల్మెట్ లేకుండా ఎదుర్కొన్నారనే సంగతి అందరికీ తెలిసిందే. అయితే, మైదానం వెలుపల ఆయన ఎంతటి సున్నిత మనస్కుడో, భార్య మాటను ఎంతగా గౌరవిస్తారో చాటిచెప్పే ఒక ఆసక్తికరమైన ఘటన ముంబైలో జరిగింది. ఒక అధికారిక కార్యక్రమంలో ముఖ్య అతిథిగా పాల్గొని ప్రసంగిస్తున్న సమయంలో భార్య నుంచి వచ్చిన ఫోన్ కాల్ కోసం గవాస్కర్ తన స్పీచ్‌ను కాసేపు నిలిపివేశారు. దీనికి సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతూ నెటిజన్ల మనసులను గెలుచుకుంటోంది.

ముంబైలోని జుహూ తారా రోడ్‌లో గల రోటరీ సర్వీస్ సెంటర్‌లో 'రోటరీ క్లబ్ ఆఫ్ బొంబాయి ఎయిర్‌పోర్ట్' ఆధ్వర్యంలో ఒక ప్రత్యేక కార్యక్రమం జరిగింది. పేద కుటుంబాలకు చెందిన దాదాపు 850 మంది చిన్నారులకు ఉచితంగా గుండె ఆపరేషన్లు విజయవంతంగా పూర్తి చేసిన సందర్భంగా 'గిఫ్ట్ ఆఫ్ లైఫ్' (Gift of Life) వేడుకలు నిర్వహించారు. ఈ కార్యక్రమానికి సునీల్ గవాస్కర్ ముఖ్య అతిథిగా విచ్చేశారు. ఆయన డయాస్‌పై నిలబడి మాట్లాడుతుండగా, ఆయన మొబైల్ ఫోన్ రింగ్ అయింది.

నేను ఎక్కువ మాట్లాడకూడదని చెప్పడానికే..!
ఫోన్ స్క్రీన్ వైపు చూసిన గవాస్కర్.. అది తన భార్య మార్ష్‌నీల్ గవాస్కర్ నుంచి వచ్చిన కాల్ అని గుర్తించారు. ఏమాత్రం సంకోచించకుండా ప్రసంగాన్ని మధ్యలోనే ఆపి.. "ఇది కచ్చితంగా మా ఆవిడే అయ్యుంటుంది. ఒక్క నిమిషం నేను ఈ కాల్ మాట్లాడాలి. నేను ఇక్కడ మరీ ఎక్కువ మాట్లాడకూడదని గుర్తుచేయడానికే ఆమె ఫోన్ చేసి ఉంటుంది" అని నవ్వుతూ సభికులకు చెప్పారు. గవాస్కర్ సమయస్ఫూర్తితో వేసిన ఈ జోక్‌కు హాలంతా నవ్వులు పూశాయి. అక్కడ ఉన్నవారంతా ఒక్కసారిగా "ఆ.. ఎంత ముద్దుగా చెప్పారు" అంటూ చప్పట్లతో అభినందించారు.

ఈ వీడియో క్లిప్ ఇంటర్నెట్‌లో ప్రత్యక్షం కాగానే నెటిజన్లు 76 ఏళ్ల గవాస్కర్‌ను తెగ పొగిడేస్తున్నారు. ఆయనను ఒక పర్ఫెక్ట్ అంటూ కామెంట్లు పెడుతున్నారు. "హెల్మెట్ లేకుండా ప్రపంచంలోనే అత్యంత వేగవంతమైన వెస్టిండీస్ బౌలర్లను ఎదుర్కొన్న గవాస్కర్ కూడా భార్య ఫోన్‌కు భయపడాల్సిందే, భయం అందరికీ ఉంటుంది" అంటూ కొందరు సరదాగా పోస్టులు పెడుతున్నారు. సెలబ్రిటీలైనా, లెజెండ్స్ అయినా కుటుంబ ప్రాధాన్యతలను మరవరని చెప్పడానికి ఈ ఘటనే ఒక ఉదాహరణ అని మరికొందరు ప్రశంసిస్తున్నారు. ఈ వైరల్ కామెడీ పక్కన పెడితే, గవాస్కర్ అక్కడ సర్జరీలు చేయించుకుని కోలుకున్న చిన్నారులతో ఎంతో ఆప్యాయంగా సమయం గడపడం అందరినీ ఆకట్టుకుంది.