ఉద్యోగం వదిలేశాక నా స్వేచ్ఛ 11 నిమిషాలకే ఆవిరైపోయింది... ఓ ఆంట్రప్రెన్యూర్ వైరల్ వీడియో

ఉద్యోగం వదిలేసి సొంతంగా వ్యాపారం మొదలుపెడితే వచ్చే స్వేచ్ఛ కేవలం 11 నిమిషాలు మాత్రమే ఉంటుందని, ఆ తర్వాత అసలైన కష్టాలు మొదలవుతాయని ఓ యువ ఎంట్రప్రెన్యూర్ పంచుకున్న అనుభవాలు ఇప్పుడు సోషల్ మీడియాలో వైరల్ అవుతున్నాయి. డిజిటల్ క్రియేటర్ మెహుల్ అగ్రవాల్, తన 9-5 ఉద్యోగాన్ని వదిలిపెట్టిన తర్వాత ఎదురైన వాస్తవాలను ఓ ఇన్‌స్టాగ్రామ్ వీడియోలో వివరించారు.

"ఉద్యోగం మానేసి సొంత బాస్ అవ్వమని సోషల్ మీడియాలో అందరూ సలహాలు ఇస్తారు. కానీ నమ్మండి, వాళ్లంతా అబద్ధం చెప్పారు. అవును, ఆ స్వేచ్ఛ కేవలం 11 నిమిషాలే ఉంటుంది. ల్యాప్‌టాప్ తెరిచిన మరుక్షణమే, 'అయ్యో, ఇప్పుడు బాధ్యత అంతా నా మీదే కదా' అనే భయం మొదలవుతుంది" అని మెహుల్ తన వీడియోలో స్పష్టం చేశారు. ఒకప్పుడు తన బాస్ ఎక్కువ పనులు ఇస్తున్నాడని ఫిర్యాదు చేసేవాడినని, ఇప్పుడు బాస్ లేకపోయినా అంతకంటే ఎక్కువ పనులు వచ్చి పడుతున్నాయని ఆయన సరదాగా వ్యాఖ్యానించారు.

ఉద్యోగం మానేసిన మొదటి రోజు ఉదయం 6 గంటలకే లేచి మూడు నెలల ప్రణాళిక సిద్ధం చేసుకున్నానని, రెండో రోజూ అదే పనిలో గడిపానని తెలిపారు. కానీ మూడో రోజు వచ్చేసరికి ఆత్మవిశ్వాసం సన్నగిల్లిందని, తాను వేసుకున్న ప్లాన్ చూసి ఆందోళన పెరిగిందని చెప్పారు. "నా జీవితంలో తీసుకున్న ప్రతి నిర్ణయాన్ని ప్రశ్నించుకున్నాను" అని ఆ క్షణంలో తన మానసిక స్థితిని వివరించారు.

అయినప్పటికీ, తన నిర్ణయం పట్ల ఎలాంటి పశ్చాత్తాపం లేదని మెహుల్ స్పష్టం చేశారు. తన శక్తిని హరించే ఉద్యోగాన్ని వదిలి, తాను నిజంగా ఇష్టపడే పనిని నిర్మించుకోవాలనే లక్ష్యంతోనే ఈ మార్గాన్ని ఎంచుకున్నానని తెలిపారు. తన ప్రయాణంలోని గెలుపోటములను ఇన్‌స్టాగ్రామ్‌ వేదికగా పంచుకుంటానని ప్రకటించారు. ఈ వీడియో, స్టార్టప్ ప్రారంభించాలనుకునే వారికి వాస్తవిక పరిస్థితులను తెలియజేసే ఒక సందేశంలా నిలుస్తోంది.