'మీట్ యువర్ సీపీ'.. ఇక సజ్జనార్ సార్ ను నేరుగా కలవచ్చు!

ప్రజలకు, పోలీసులకు మధ్య సంబంధాలు బలోపేతం చేసే దిశగా హైదరాబాద్ నగర పోలీసులు మరో వినూత్న కార్యక్రమానికి శ్రీకారం చుట్టారు. నగరవాసులు తమ సమస్యలు, ఫిర్యాదులు, సూచనలను నేరుగా కమిషనర్‌కే తెలియజేసేందుకు వీలుగా 'మీట్ యువర్ సీపీ' కార్యక్రమాన్ని ప్రారంభించారు. హైదరాబాద్ పోలీస్ కమిషనర్ వీసీ సజ్జనార్ ఈ కొత్త కార్యక్రమాన్ని ప్రవేశపెట్టారు. దీని ద్వారా ఎలాంటి ముందస్తు అపాయింట్‌మెంట్ అవసరం లేకుండానే ప్రజలు ఆయన్ను కలిసి తమ గోడు వెళ్లబోసుకోవచ్చు.

ఈ కార్యక్రమం ఈ వారం నుంచే అమల్లోకి వచ్చింది. ప్రతిరోజూ మధ్యాహ్నం 2 గంటల నుంచి బంజారాహిల్స్‌లోని తెలంగాణ ఇంటిగ్రేటెడ్ కమాండ్ అండ్ కంట్రోల్ సెంటర్ (TGICCC)లో ఉన్న పోలీస్ ప్రధాన కార్యాలయంలో కమిషనర్ ప్రజలకు అందుబాటులో ఉంటారు. ముఖ్యంగా, పాతబస్తీ వాసులు సుదూరం ప్రయాణించాల్సిన అవసరం లేకుండా, వారి సౌకర్యార్థం ప్రతి శుక్రవారం పురానీ హవేలీలోని కోత్వాల్ హౌస్‌లో ప్రత్యేకంగా కార్యక్రమాన్ని నిర్వహిస్తారు.

శాంతిభద్రతలు, ట్రాఫిక్ నిర్వహణ, స్థానిక భద్రత వంటి అనేక అంశాలపై ప్రజల నుంచి నేరుగా అభిప్రాయాలు స్వీకరించి, వాటిని సత్వరమే పరిష్కరించడం ఈ కార్యక్రమ ముఖ్య ఉద్దేశమని పోలీస్ ఉన్నతాధికారులు తెలిపారు. ప్రజల నుంచి వచ్చే ఫిర్యాదులను స్వీకరించి, సంబంధిత విభాగాలకు పంపించి, నిర్దిష్ట గడువులోగా పరిష్కరించేలా చర్యలు తీసుకుంటామని వారు హామీ ఇచ్చారు. పారదర్శకమైన పోలీసింగ్‌ను అందించడంలో భాగంగానే ఈ చొరవ తీసుకున్నట్లు పేర్కొన్నారు.

'మీట్ యువర్ సీపీ' కార్యక్రమం గురించి కమిషనర్ సజ్జనార్ తన 'ఎక్స్' ఖాతా ద్వారా ఒక వీడియోను పంచుకున్నారు. ప్రజలతో నేరుగా మమేకమవడం ద్వారా వారిలో పోలీసులపై నమ్మకాన్ని పెంచవచ్చని, ఈ అవకాశాన్ని నగరవాసులు సద్వినియోగం చేసుకోవాలని ఆయన కోరారు. సైబర్ మోసాలపై ప్రజలను అప్రమత్తం చేయడం, ఉత్తమ సేవలు అందించిన సిబ్బందికి రివార్డులు ఇవ్వడం వంటి కార్యక్రమాలతో పాటు, ఈ కొత్త చొరవ కూడా పోలీసు శాఖకు ప్రజలను మరింత చేరువ చేస్తుందని భావిస్తున్నారు.