ఆరోగ్యానికి అరటి దూట కూర.. నటి సమీరా రెడ్డి స్పెషల్ రెసిపీ

నటి సమీరా రెడ్డి తన సోషల్ మీడియా వేదికగా తరచూ ఆరోగ్య చిట్కాలను పంచుకుంటూ ఉంటారు. తాజాగా ఆమె ఉదర ఆరోగ్యానికి (గట్ హెల్త్) ఎంతో మేలు చేసే అరటి దూట, పప్పు రెసిపీని అభిమానులతో పంచుకున్నారు. రుచితో పాటు ఆరోగ్యాన్ని అందించే ఈ రెసిపీ తయారీ విధానాన్ని, దాని ప్రయోజనాలను ఆమె వివరంగా తెలిపారు.

ఈ కూర తయారీకి ముందుగా శుభ్రం చేసిన అరటి దూట ముక్కలు, కంది లేదా పెసరపప్పును పసుపు, ఉప్పు వేసి ప్రెషర్ కుక్కర్‌లో మెత్తగా ఉడికించాలి. ఆ తర్వాత పచ్చి కొబ్బరి తురుము, పచ్చిమిర్చి, జీలకర్ర కలిపి మెత్తని పేస్ట్‌గా చేసుకోవాలి. ఇప్పుడు నేతిలో ఆవాలు, ఎండుమిర్చి, కరివేపాకుతో తాలింపు పెట్టి, ఉడికిన పప్పు-దూట మిశ్రమంలో కలపాలి. చివరగా కొబ్బరి పేస్ట్ కూడా వేసి కొన్ని నిమిషాలు ఉడికిస్తే కూర సిద్ధమవుతుంది.

ఈ కూర వల్ల కలిగే ప్రయోజనాలను కూడా సమీరా వివరించారు. "దీనిలో ఫైబర్, ఐరన్ పుష్కలంగా ఉండటం వల్ల నీరసం తగ్గుతుంది. హార్మోన్ల సమతుల్యతకు, జీర్ణవ్యవస్థ శుభ్రతకు ఇది తోడ్పడుతుంది. ఉబ్బరం, శ‌రీరంలో నీరు చేరడం వంటి సమస్యలను తగ్గిస్తుంది. బరువు తగ్గాలనుకునే వారికి, నెలసరి సమస్యలతో బాధపడేవారికి, రక్తంలో చక్కెర స్థాయిలను నియంత్రించుకోవడానికి కూడా ఈ కూర ఎంతో ఉపయోగపడుతుంది" అని ఆమె పేర్కొన్నారు.

అయితే, ఈ కూర వండేటప్పుడు ఒక ముఖ్యమైన విషయాన్ని గుర్తుంచుకోవాలని సమీరా సూచించారు. అరటి దూటలో ఉండే నార లేదా పీచును వంటకు ముందే పూర్తిగా తొలగించాలని, అవి సులభంగా జీర్ణం కావని హెచ్చరించారు. ఈ నారను తీసేయడం వల్ల కూర తేలికగా జీర్ణమవుతుందని, జీర్ణవ్యవస్థకు మేలు చేస్తుందని ఆమె స్పష్టం చేశారు.