యూఎస్‌లో బాలయ్య సరికొత్త రికార్డు.. సీనియర్ హీరోల్లో ఎవరికీ సాధ్యం కాని అరుదైన ఫీట్!

నందమూరి బాలకృష్ణ బాక్సాఫీస్ వద్ద తన సత్తా ఏంటో మరోసారి చాటారు. ముఖ్యంగా ఓవర్సీస్ మార్కెట్‌లో, అదీ నార్త్ అమెరికాలో ఆయనకు ఉన్న పట్టు మరోసారి రుజువైంది. బోయపాటి శ్రీను దర్శకత్వంలో వచ్చిన ‘అఖండ 2: తాండవం’ చిత్రానికి మిశ్రమ స్పందనలు వచ్చినప్పటికీ, వసూళ్ల విషయంలో మాత్రం బాలయ్య జోరు తగ్గలేదు. ఈ చిత్రం తాజాగా యూఎస్‌లో 1 మిలియన్ డాలర్ల గ్రాస్ వసూళ్ల మార్క్‌ను అధిగమించింది.

దీంతో బాలకృష్ణ ఓ అరుదైన రికార్డును తన ఖాతాలో వేసుకున్నారు. వరుసగా ఐదు చిత్రాలతో 1 మిలియన్ డాలర్ల మార్క్‌ను అందుకున్న ఏకైక సీనియర్ హీరోగా ఆయన నిలిచారు. ‘అఖండ’, ‘వీరసింహారెడ్డి’, ‘భగవంత్ కేసరి’, ‘డాకు మహారాజ్’ చిత్రాల తర్వాత ఇప్పుడు ‘అఖండ 2’ కూడా ఈ జాబితాలో చేరింది. ఒక సీనియర్ హీరో ఈ స్థాయిలో వరుస విజయాలు అందుకోవడం టాలీవుడ్‌లో ఇదే మొదటిసారి.

ఇంతేకాకుండా, నార్త్ అమెరికాలో మొత్తం ఆరు 1 మిలియన్ డాలర్ల చిత్రాలు కలిగిన ఏకైక సీనియర్ హీరోగా కూడా బాలయ్య రికార్డు సృష్టించారు. గతంలో ఆయన నటించిన ‘గౌతమీపుత్ర శాతకర్ణి’ సైతం ఈ ఘనత సాధించింది. సినిమా ఫలితంతో సంబంధం లేకుండా అభిమానుల అండతో బాక్సాఫీస్ వద్ద తన మార్కెట్ పవర్‌ను బాలయ్య మరోసారి నిరూపించారని ట్రేడ్ వర్గాలు పేర్కొంటున్నాయి.

ప్రస్తుతం బాలకృష్ణ, దర్శకుడు గోపిచంద్ మలినేనితో ‘ఎన్బీకే 111’ చిత్రంలో నటిస్తున్నారు. ఈ సినిమా షూటింగ్ శరవేగంగా జరుగుతుండగా, వచ్చే ఏడాది విడుదల చేసేందుకు సన్నాహాలు చేస్తున్నారు.