మూన్ లైటింగ్ అభియోగాలతో అమెరికాలో భారత సంతతి వ్యక్తి అరెస్ట్.. నేరం రుజువైతే 15 ఏళ్ల జైలు శిక్ష

అమెరికాలో భారత సంతతికి చెందిన ఓ వ్యక్తి భారీ మోసానికి పాల్పడ్డాడన్న ఆరోపణలపై అరెస్టయ్యాడు. ఒకే సమయంలో రెండు పూర్తిస్థాయి ఉద్యోగాలు చేస్తూ (మూన్ లైటింగ్) ప్రభుత్వ నిధులను దుర్వినియోగం చేశాడన్న అభియోగాలపై పోలీసులు అతడిని అదుపులోకి తీసుకున్నారు. ఈ నేరం రుజువైతే అతనికి 15 ఏళ్ల వరకు జైలు శిక్ష పడే అవకాశం ఉంది.

వివరాల్లోకి వెళితే, న్యూయార్క్‌లోని సరటోగా కౌంటీలో నివసిస్తున్న 39 ఏళ్ల మేహుల్ గోస్వామిని స్థానిక షెరీఫ్ కార్యాలయం అరెస్ట్ చేసింది. అతను న్యూయార్క్ స్టేట్ ఆఫీస్ ఆఫ్ ఇన్ఫర్మేషన్ టెక్నాలజీ సర్వీసెస్ (ITS)లో రిమోట్ ఉద్యోగిగా పనిచేస్తూనే, మాల్టాలోని మరో సంస్థలో కూడా పూర్తిస్థాయి ఉద్యోగం చేస్తున్నట్లు దర్యాప్తులో తేలింది. ఈ విధంగా అతను ప్రభుత్వానికి 50,000 డాలర్లకు (సుమారు రూ. 44 లక్షలు) పైగా నష్టం కలిగించాడని అధికారులు ఆరోపిస్తున్నారు. అతనిపై సెకండ్-డిగ్రీ గ్రాండ్ లార్సెనీ కింద కేసు నమోదు చేశారు.

ఈ అరెస్ట్‌పై న్యూయార్క్ స్టేట్ ఇన్‌స్పెక్టర్ జనరల్ లూసీ లాంగ్ స్పందించారు. "ప్రభుత్వ ఉద్యోగులు నిజాయతీతో సేవ చేయాల్సిన బాధ్యతను కలిగి ఉంటారు. గోస్వామి చర్య ఆ నమ్మకాన్ని తీవ్రంగా ఉల్లంఘించింది. ప్రభుత్వానికి పనిచేస్తున్నానని చెబుతూనే మరో ఉద్యోగం చేయడం పన్ను చెల్లింపుదారుల డబ్బును దుర్వినియోగం చేయడమే" అని ఆమె అన్నారు.

సరటోగా కౌంటీ షెరీఫ్ కార్యాలయం, స్టేట్ ఇన్‌స్పెక్టర్ జనరల్ కార్యాలయం సంయుక్తంగా ఈ కేసుపై దర్యాప్తు చేపట్టాయి. అక్టోబర్ 15న గోస్వామిని అరెస్ట్ చేశారు. న్యూయార్క్‌లో అమల్లో ఉన్న కొత్త చట్టాల ప్రకారం, అతనిపై మోపిన అభియోగాలకు బెయిల్ లభించే అవకాశం లేదు. ప్రభుత్వ రికార్డుల ప్రకారం, గోస్వామి ఐటీ విభాగంలో ప్రాజెక్ట్ కోఆర్డినేటర్‌గా పనిచేస్తూ 2024 సంవత్సరానికి 1,17,891 డాలర్ల వార్షిక వేతనం పొందుతున్నాడు.