హైదరాబాద్‌లో భారీ అగ్ని ప్రమాదం

హైదరాబాద్‌లోని హయత్ నగర్‌లో భారీ అగ్ని ప్రమాదం సంభవించింది. లక్ష్మీప్రియ కాలనీలో గల ఒక ప్లాస్టిక్ గోదాంలో ప్రమాదవశాత్తు మంటలు చెలరేగాయి. వెంటనే స్పందించిన అగ్నిమాపక సిబ్బంది రెండు ఫైరింజన్ల సహాయంతో మంటలను అదుపు చేస్తున్నారు. ఈ దుర్ఘటనలో దాదాపు రూ. 20 లక్షల మేర ఆస్తి నష్టం వాటిల్లినట్లు సమాచారం.

మంటల్లో కాలిపోయిన కారు

నల్గొండ జిల్లా నార్కట్‌పల్లి మండలం ఎల్లారెడ్డిగూడెంశివారులో ఒక ఖరీదైన కారు అగ్నికి ఆహూతైంది. నార్కట్‌పల్లి-అద్దంకి రహదారిపై ప్రయాణిస్తుండగా కారులో ఒక్కసారిగా మంటలు చెలరేగాయి. అప్రమత్తంగా వ్యవహరించిన డ్రైవర్ వెంటనే కారును పక్కకు ఆపడంతో అందులోని ప్రయాణికులందరూ సురక్షితంగా బయటపడ్డారు. అగ్నిమాపక సిబ్బంది మంటలను ఆర్పివేశారు. షార్ట్ సర్క్యూట్ కారణంగా ఈ ప్రమాదం జరిగి ఉండవచ్చని పోలీసులు భావిస్తున్నారు.