గ్రీన్ ఇండియా ఛాలెంజ్‌లో పాల్గొన్న స‌ల్మాన్ ఖాన్‌

బాలీవుడ్ కండ‌ల వీరుడు స‌ల్మాన్ ఖాన్ బుధ‌వారం గ్రీన్ ఇండియా ఛాలెంజ్‌లో పాలుపంచుకున్నారు. రామోజీ ఫిల్మ్ సిటీలో ఓ మొక్క‌ను ఆయ‌న నాటారు. టీఆర్ఎస్ ఎంపీ జోగినప‌ల్లి సంతోష్ కుమార్ ప్రారంభించిన ఈ కార్య‌క్ర‌మంలో దాదాపుగా అన్ని రంగాల‌కు చెందిన ప్ర‌ముఖులు ఉత్సాహంగా పాలుపంచుకుంటున్న సంగ‌తి తెలిసిందే. ఓ సినిమా షూటింగ్ నిమిత్తం హైద‌రాబాద్‌లోని రామోజీ ఫిల్మ్ సిటీకి వ‌చ్చిన స‌ల్మాన్‌... ఓ మొక్క‌ను నాటి ఈ కార్య‌క్ర‌మంలో భాగ‌స్వామి అయ్యారు.

ఈ సంద‌ర్భంగా స‌ల్మాన్ ఖాన్ త‌న అభిమానుల‌కు కూడా ఈ కార్య‌క్ర‌మంలో పాలుపంచుకునే దిశ‌గా పిలుపునిచ్చారు. ఎంపీ సంతోష్ కుమార్ ఇచ్చిన పిలుపు మేర‌కు తాను గ్రీన్ ఇండియా ఛాలెంజ్‌లో పాలుపంచుకున్నాన‌ని స‌ల్మాన్ పేర్కొన్నారు. గ్లోబ‌ల్ వార్మింగ్‌ను క‌ట్ట‌డి చేసే క్ర‌మంలో త‌న అభిమానులు కూడా ఈ కార్య‌క్ర‌మంలో పాలుపంచుకోవాల‌ని ఆయ‌న పిలుపునిచ్చారు.