ఏపీ మంత్రి అయ్యన్న పాత్రుడి హత్యకు కుట్ర.. దుమారం రేపుతున్న వీడియో

ఆంధ్రప్రదేశ్ మంత్రి చింతకాయల అయ్యన్న పాత్రుడి హత్యకు ఆయన కుటుంబంలోని వ్యక్తులు ప్రయత్నిస్తున్నారంటూ సోషల్ మీడియాలో వైరల్ అవుతున్న ఓ వీడియో తీవ్ర దుమారం రేపుతోంది. అయ్యన్న పాత్రుడి సోదరుడు సన్యాసి పాత్రుడు కొందరు వ్యక్తులతో మాట్లాడుతున్నట్టుగా ఆ వీడియోలో ఉంది. అందరూ కలిసి అయ్యన్న హత్యకు కుట్ర రచిస్తున్నారని ఆ వీడియోలో ఉంది. రెండు రోజులుగా సోషల్ మీడియాను చుట్టేస్తున్న ఈ వీడియోపై సన్యాసిపాత్రుడి కుమారుడు వరుణ్ స్పందించారు. తన తండ్రిపై పథకం ప్రకారం కుట్ర జరుగుతోందని, ఆయన ప్రతిష్ఠను దెబ్బతీసేందుకు ఎవరో కావాలనే ఇటువంటివి సృష్టిస్తున్నారని ఆందోళన వ్యక్తం చేశారు.

ఈ ఘటనపై సన్యాసి పాత్రుడు కూడా స్పందించారు. ఆ వీడియోలో చెబుతున్నదంతా అబద్ధమని, తనపై పథకం ప్రకారం దుష్ప్రచారం జరుగుతోందని అన్నారు. ఈ నెల 21న ఓ వివాహానికి హాజరయ్యానని, అదే కార్యక్రమానికి నాతవరానికి చెందిన ప్రతిపక్ష నేతలు కూడా హాజరైనట్టు చెప్పారు. ఈ సందర్భంగా వరండాలో వారు ఎదురవడంతో మర్యాదపూర్వకంగా మాట్లాడుకున్నాం తప్ప మరేమీ లేదని స్పష్టం చేశారు. అక్కడి సీసీ టీవీ ఫుటేజీని సేకరించిన కొందరు దానిని తమకు అనుకూలంగా మార్చుకుని, హత్యకు కుట్ర జరుగుతున్నట్టు ప్రచారం చేసుకుంటున్నారని మండిపడ్డారు. ఈ వీడియో వెనక ఉన్న వ్యక్తులను గుర్తించి చర్యలు తీసుకోవాల్సిందిగా పోలీసులను కోరారు. ఈ మేరకు మంగళవారం రాత్రి విశాఖపట్టణం ఎస్పీని కలిసి వినతిపత్రం సమర్పించారు.