టాలీవుడ్ అగ్ర నటుడు, జనసేన అధినేత పవన్ కల్యాణ్... ఏపీకి ప్రత్యేక హోదాను డిమాండ్ చేస్తూ ఏర్పాటు చేసిన ‘సీమాంధ్ర ఆత్మ గౌరవ సభ’ నేడు తూర్పు గోదావరి జిల్లా కాకినాడలో జరగనుంది. నగరంలోని జేఎన్టీయూ క్యాంపస్ లో జరగనున్న ఈ బహిరంగ సభకు ఇప్పటికే ఏర్పాట్లన్నీ పూర్తయ్యాయి. ఇక సభకు హాజరయ్యేందుకు నిన్న రాత్రికే పవన్ కల్యాణ్ కాకినాడ చేరుకున్నారు. అదే సమయంలో ఈ సభకు హాజరయ్యేందుకు వేలాదిగా పవన్ కల్యాణ్ అభిమానులు కాకినాడకు తరలివస్తున్నారు. ఏపీకి ప్రత్యేక హోదా ఇవ్వలేమని తేల్చేసిన కేంద్రం... ప్రత్యేక ప్యాకేజీని ప్రకటించిన నేపథ్యంలో పవన్ కల్యాణ్ ఏ విధంగా స్పందిస్తారన్న అంశంపై ఏపీ ప్రజలంతా ఆయన సభపై అమితాసక్తి చూపుతున్నారు.
