లార్డ్స్‌లో హర్మన్‌ప్రీత్ కౌర్ చారిత్రక రికార్డ్.. తొలి భారత క్రికెటర్‌గా అరుదైన‌ ఘనత!

'క్రికెట్ మక్కా'గా పేరుగాంచిన చారిత్రక లార్డ్స్ మైదానంలో భారత మహిళల క్రికెట్ జట్టు కెప్టెన్ హర్మన్‌ప్రీత్ కౌర్ అరుదైన రికార్డును తన ఖాతాలో వేసుకుంది. క్రికెట్‌లోని మూడు ఫార్మాట్లు అయిన టెస్టు, వన్డే, టీ20లలో ఈ మైదానంలో అర్ధశతకం సాధించిన తొలి భారత క్రికెటర్‌గా (పురుషులు, మహిళలతో సహా) ఆమె చరిత్ర సృష్టించింది. అంతేకాకుండా ప్రపంచంలో ఈ ఘనత సాధించిన తొలి మహిళా క్రికెటర్‌గా కూడా నిలిచింది.

ఇంగ్లండ్‌తో నిన్న‌ ప్రారంభమైన తొలి మహిళల టెస్టు మ్యాచ్‌లో హర్మన్‌ప్రీత్ ఈ అసాధారణ ఫీట్‌ను అందుకుంది. టాస్ గెలిచి బ్యాటింగ్ ఎంచుకున్న భారత జట్టు ఆరంభంలో తడబడింది. 37 పరుగులకే యువ ఓపెనర్ షఫాలీ వర్మ, యాస్తికా భాటియా వికెట్లను కోల్పోయి కష్టాల్లో పడింది. ఈ క్లిష్ట సమయంలో సీనియర్ ఓపెనర్ స్మృతి మంధాన (83), జెమీమా రోడ్రిగ్స్ (35) ఇన్నింగ్స్‌ను చక్కదిద్దారు. వీరిద్దరూ మూడో వికెట్‌కు 64 పరుగుల భాగస్వామ్యం నెలకొల్పారు.

అనంతరం కెప్టెన్ హర్మన్‌ప్రీత్ కౌర్, స్మృతి మంధానతో కలిసి భారత స్కోరు బోర్డును ముందుకు నడిపించింది. వీరిద్దరూ నాలుగో వికెట్‌కు 89 పరుగుల కీలక భాగస్వామ్యాన్ని నమోదు చేశారు. ఎంతో నిలకడగా ఆడిన హర్మన్‌ప్రీత్, 121 బంతుల్లో 58 పరుగులు చేసి తన చారిత్రక హాఫ్ సెంచరీని పూర్తి చేసుకుంది. అయితే, టీ విరామానికి ముందు అరంగేట్ర బౌలర్ మ్యాడీ విలియర్స్ బౌలింగ్‌లో ఆమె క్లీన్ బౌల్డ్ అయింది. ఇప్పటికే లార్డ్స్‌లో వన్డే, టీ20లలో అర్ధశతకాలు చేసిన 37 ఏళ్ల కౌర్, తన తొలి టెస్టు ఇన్నింగ్స్‌లోనే ఈ ఘనత సాధించడం విశేషం.

స్మృతి, హర్మన్‌ప్రీత్ ఔటైన తర్వాత, లోయర్ ఆర్డర్‌లో దీప్తి శర్మ (57) అద్భుతంగా రాణించడంతో భారత జట్టు తన తొలి ఇన్నింగ్స్‌లో 285 పరుగుల గౌరవప్రదమైన స్కోరు వద్ద ఆలౌట్ అయింది. అనంతరం బ్యాటింగ్ ప్రారంభించిన ఇంగ్లండ్, తొలి రోజు ఆట ముగిసే సమయానికి ఒక వికెట్ నష్టానికి 21 పరుగులు చేసింది. ప్రస్తుతం భారత్ కంటే 264 పరుగులు వెనుకబడి ఉంది. లార్డ్స్ మైదానంలో మహిళల టెస్టు జరగడం ఇదే ప్రప్రథమం కాగా, ఈ చారిత్రక మ్యాచ్‌లో హర్మన్‌ప్రీత్ అరుదైన రికార్డు నెలకొల్పడం భారత క్రికెట్ అభిమానులకు గర్వకారణంగా నిలిచింది.