20 రోజులు గాయాలతోనే షూటింగ్.. 'పెద్ది' కోసం చరణ్ డెడికేషన్ పీక్స్

గ్లోబల్ స్టార్ రామ్ చరణ్ 'పెద్ది' చిత్రం కోసం అపూర్వమైన అంకితభావం ప్రదర్శించారని దర్శకుడు బుచ్చిబాబు సానా వెల్లడించారు. బుచ్చిబాబు సానా దర్శకత్వంలో రూపుదిద్దుకున్న ఈ రూరల్ స్పోర్ట్స్ యాక్షన్ డ్రామా రేపు (జూన్ 4) ప్రేక్షకుల ముందుకు వస్తోంది. ఇందులో రామ్ చరణ్ ఒక రెజ్లర్ పాత్రలో కనిపించనున్నారు. ఈ పాత్రలో సహజంగా కనిపించడం కోసం చరణ్ చేసిన కఠోర శ్రమ ఇప్పుడు ఇండస్ట్రీలో హాట్ టాపిక్‌గా మారింది.

సినిమాలోని కుస్తీ సన్నివేశాలు వాస్తవికంగా ఉండాలనే ఉద్దేశంతో చిత్ర బృందం ప్రత్యేక శ్రద్ధ తీసుకుందని బుచ్చిబాబు వెల్లడించారు. దీనికోసం రామ్ చరణ్ దాదాపు 3-4 నెలల పాటు కఠినమైన కుస్తీ శిక్షణ తీసుకున్నారని తెలిపారు. విశేషమేమిటంటే, ఆమిర్ ఖాన్ 'దంగల్' చిత్రానికి పనిచేసిన కోచ్‌నే ఈ సినిమా కోసం కూడా నియమించుకున్నట్టు వెల్లడించారు. అంతేకాకుండా, తెలంగాణకు చెందిన నిజమైన రెజ్లర్లను కూడా ఈ షూటింగ్‌లో భాగం చేసి, వారితో పాటు ఇతర నటీనటులకు కూడా శిక్షణ ఇప్పించామని వివరించారు.

ఈ క్రమంలో రామ్ చరణ్ తీవ్రంగా గాయపడినట్లు వెల్లడించారు. కుస్తీ సన్నివేశాల చిత్రీకరణకు కొద్ది రోజుల ముందు ఒక కండరం గాయానికి గురికాగా, ఆ గాయం ఏకంగా ఏడు చోట్లకు వ్యాపించిందని తెలిపారు. అయినప్పటికీ, నొప్పిని భరిస్తూనే, ఎలాంటి మెడికల్ స్కానింగ్ చేయించుకోకుండా 20 రోజుల పాటు సాగిన సుదీర్ఘ షెడ్యూల్‌ను పూర్తి చేయడం రామ్ చరణ్ డెడికేషన్‌కు నిదర్శనం అని బుచ్చిబాబు సానా కొనియాడారు.

ఈ చిత్రంలో రామ్ చరణ్ సరసన జాన్వీ కపూర్ హీరోయిన్‌గా నటిస్తుండగా, బోమన్ ఇరానీ, శివ రాజ్‌కుమార్, దివ్యేందు శర్మ, జగపతి బాబు వంటి ప్రముఖ నటులు కీలక పాత్రలు పోషిస్తున్నారు.