అలా ఎలా జరిగిందబ్బా?.. సోషల్ మీడియాలో వైరల్ అవుతున్న వీడియో!

అనంతపురం కలెక్టరేట్ ఎదుట జరిగిన ఓ ప్రమాదానికి సంబంధించిన వీడియో సోషల్ మీడియాలో విపరీతంగా వైరల్ అవుతోంది. జూన్ 15న మధ్యాహ్నం మూడున్నర గంటల ప్రాంతంలో జరిగిందీ ఘటన. కలెక్టరేట్ ఎదురుగా ఓ ప్రయాణికుడు నిల్చున్నాడు. అంతలో ఓ ట్రాక్టర్ వేగంగా దూసుకొచ్చింది. అతడు తేరుకునేలోపే అతడిపై నుంచి దూసుకెళ్లింది. ప్రమాదాన్ని గుర్తించినా ట్రాక్టర్ డ్రైవర్ మాత్రం ఆపకుండా ముందుకు వెళ్లాడు. సరిగ్గా అప్పుడే అద్భుతం జరిగింది.

ట్రాక్టర్ కాస్తా ముందుకు వెళ్లగానే ఆ వ్యక్తి నిదానంగా లేచి దులుపుకుని ట్రాక్టర్ డ్రైవర్‌ను కేకేసి గొడవకు దిగాడు. ట్రాక్టర్ పై నుంచి వెళ్లినప్పటికీ చిన్నగాయం కూడా కాకుండా బయటపడిన అతడిని చూసి చుట్టుపక్కల వారు ఆశ్చర్యపోయారు. పోలీసులు ఇటీవల ఇక్కడి సీసీ టీవీ ఫుటేజీలను పరిశీలించగా ఈ విషయం వెలుగులోకి వచ్చింది. ఘటనపై బాధితుడు ఫిర్యాదు చేయకపోవడంతో విషయం వెలుగులోకి రాలేదని  పోలీసులు తెలిపారు. కాగా, ఇప్పుడీ వీడియో సామాజిక మాధ్యమాల్లో తెగ వైరల్ అవుతోంది. అతడి అదృష్టానికి అందరూ ఆశ్చర్యపోతున్నారు.