అయ్యప్ప భక్తులకు శుభవార్త.. హైదరాబాద్, ఏపీ నుంచి ప్రత్యేక రైళ్లు

శబరిమల అయ్యప్ప స్వామి మండల, మకరవిళక్కు పూజల సీజన్ ప్రారంభం కానున్న నేపథ్యంలో అయ్యప్ప భక్తులకు దక్షిణ మధ్య రైల్వే తీపి కబురు అందించింది. తెలుగు రాష్ట్రాల నుంచి కేరళలోని కొల్లాంకు భారీగా తరలివెళ్లే భక్తుల రద్దీని దృష్టిలో ఉంచుకుని హైదరాబాద్, చర్లపల్లి, మచిలీపట్నం ప్రాంతాల నుంచి కొల్లాం వరకు ప్రత్యేక ఎక్స్‌ప్రెస్ రైళ్లను నడపనున్నట్లు ప్రకటించింది.

చర్లపల్లి – కొల్లాం ప్రత్యేక రైళ్లు (07180 / 07181)

చర్లపల్లి నుంచి కొల్లాం వెళ్లే ప్రత్యేక రైలు (నంబర్ 07180) నవంబర్ 20 నుంచి డిసెంబర్ 25 వరకు ప్రతి శుక్రవారం రాత్రి 11:45 గంటలకు బయలుదేరి, మరుసటి రోజు ఉదయం 7:55 గంటలకు కొల్లాం చేరుకుంటుంది. తిరుగు ప్రయాణంలో కొల్లాం – చర్లపల్లి స్పెషల్ రైలు (నంబర్ 07181) నవంబర్ 22 నుంచి డిసెంబర్ 27 వరకు ప్రతి ఆదివారం ఉదయం 10:40 గంటలకు కొల్లాంలో బయలుదేరి, మరుసటి రోజు రాత్రి 7:00 గంటలకు చర్లపల్లికి చేరుకుంటుంది.

ఈ రైలు నల్గొండ, మిర్యాలగూడ, నడికుడి, పిడుగురాళ్ల, గుంటూరు, తెనాలి, బాపట్ల, చీరాల, ఒంగోలు, నెల్లూరు మీదుగా ప్రయాణిస్తుంది. తమిళనాడు, కేరళ రాష్ట్రాల్లోని పెరంబూర్, అరక్కోణం, కాట్పాడి, జోలార్‌పేటై, సేలం, ఈరోడ్, తిరుప్పూర్, పోదనూర్, పాలక్కాడ్, త్రిసూర్, అలువా, ఎర్నాకుళం టౌన్, కొట్టాయం, చంగనస్సేరి, తిరువల్ల, చెంగన్నూర్, మావేలికర, కాయంకుళం, కరుణాగపల్లి, శాస్తాంకోట తదితర కీలక స్టేషన్లలో ఈ రైలు ఆగుతుంది.

హైదరాబాద్ – కొల్లాం ప్రత్యేక రైళ్లు (07193 / 07194)

హైదరాబాద్ నుంచి కొల్లాం వెళ్లే ప్రత్యేక రైలు (నంబర్ 07193) డిసెంబర్ 5 నుంచి డిసెంబర్ 26 వరకు ప్రతి శనివారం రాత్రి 11:10 గంటలకు బయలుదేరి, సోమవారం ఉదయం 7:15 గంటలకు కొల్లాం చేరుకుంటుంది. తిరుగు ప్రయాణంలో కొల్లాం – హైదరాబాద్ ప్రత్యేక రైలు (నంబర్ 07194) డిసెంబర్ 7 నుంచి డిసెంబర్ 28 వరకు ప్రతి సోమవారం ఉదయం 10:55 గంటలకు బయలుదేరి, మరుసటి రోజు సాయంత్రం 6:30 గంటలకు హైదరాబాద్ చేరుకుంటుంది.

ఈ సర్వీసు సికింద్రాబాద్, చర్లపల్లి, నల్గొండ, మిర్యాలగూడ, నడికుడి, పిడుగురాళ్ల, గుంటూరు, తెనాలి, బాపట్ల, చీరాల, ఒంగోలు, నెల్లూరు స్టేషన్ల మీదుగా సాగుతుంది. అలాగే పెరంబూర్, అరక్కోణం, కాట్పాడి, జోలార్‌పేటై, సేలం, ఈరోడ్, తిరుప్పూర్, పోదనూర్, పాలక్కాడ్, త్రిసూర్, అలువా, ఎర్నాకుళం టౌన్, కొట్టాయం, చంగనస్సేరి, తిరువల్ల, చెంగన్నూర్, మావేలికర, కాయంకుళం స్టేషన్లలో హాల్ట్ కల్పించారు.

మచిలీపట్నం – కొల్లాం ప్రత్యేక రైళ్లు (08539 / 08540)

ఆంధ్రప్రదేశ్ నుంచి ప్రయాణించే భక్తుల కోసం మచిలీపట్నం – కొల్లాం మధ్య మరో ప్రత్యేక రైలును అందుబాటులోకి తెచ్చారు. రైలు నంబర్ 08539 నవంబర్ 22 నుంచి జనవరి 24 వరకు ప్రతి ఆదివారం ఉదయం 9:20 గంటలకు మచిలీపట్నంలో బయలుదేరి, మరుసటి రోజు రాత్రి 9:30 గంటలకు కొల్లాం చేరుకుంటుంది. తిరుగు ప్రయాణంలో రైలు నంబర్ 08540 నవంబర్ 24 నుంచి జనవరి 26 వరకు ప్రతి మంగళవారం మధ్యాహ్నం 2:30 గంటలకు కొల్లాంలో బయలుదేరుతుంది. ఈ రైలు విజయనగరం, విశాఖపట్నం, రాజమండ్రి, విజయవాడ, తెనాలి, ఒంగోలు, నెల్లూరు మీదుగా కొల్లాం చేరుకుంటుంది.

శబరిమల యాత్రకు సిద్ధమవుతున్న భక్తులు ఈ ప్రత్యేక రైలు సర్వీసులను వినియోగించుకోవాలని రైల్వే వర్గాలు సూచించాయి. ప్రత్యేక రైళ్ల సమయాలు, సర్వీసుల నిర్వహణలో మార్పులు ఉండే అవకాశం ఉన్నందున, ప్రయాణికులు అధికారిక సమాచారం, టికెట్ బుకింగ్, బెర్తుల లభ్యత కోసం ఇండియన్ రైల్వేస్ లేదా ఐఆర్‌సీటీసీ (IRCTC) వెబ్‌సైట్, యాప్‌ను పరిశీలించాలని అధికారులు స్పష్టం చేశారు.