ఇకపై నేను బ్రిటిష్ పౌరుడిని.. ఇది నాకు గర్వకారణం: లలిత్ మోదీ

ఐపీఎల్ వ్యవస్థాపకుడు, వివాదాస్పద వ్యాపారవేత్త లలిత్ మోదీ అధికారికంగా బ్రిటన్ పౌరసత్వం స్వీకరించారు. ఈ ఏడాది సెప్టెంబర్ 15న తాను బ్రిటన్ పౌరుడిగా మారినట్లు ఆయన స్వయంగా ప్రకటించారు. ఇది తన జీవితంలో ఎంతో గర్వకారణమైన, వ్యక్తిగతమైన మైలురాయి అని ఆయన అభివర్ణించారు.

శనివారం ఆక్స్‌ఫర్డ్ యూనియన్‌లో జరిగిన ఒక కార్యక్రమంలో ప్రసంగిస్తూ లలిత్ మోదీ ఈ కీలక ప్రకటన చేశారు. అనంతరం సోషల్ మీడియా ప్లాట్‌ఫామ్ 'ఎక్స్' వేదికగా ఒక సుదీర్ఘ పోస్ట్ చేశారు. "చాలా సంవత్సరాలుగా యూకేనే నా ఇల్లు. ఇక్కడి ప్రజలు, సంస్థలు, సంప్రదాయాలు, విలువలను నేను ఎంతగానో గౌరవిస్తాను. కుటుంబసభ్యులు, సన్నిహితుల సమక్షంలో సెప్టెంబర్ 15న బ్రిటిష్ పౌరసత్వం స్వీకరించే వేడుకను జరుపుకున్నాను" అని తెలిపారు.

"బ్రిటిష్ పౌరుడిగా మారడం ఒక గొప్ప అవకాశం, అదే సమయంలో ఒక బాధ్యత కూడా. దీనిని నేను గర్వంతో, కృతజ్ఞతతో, ఈ దేశానికి చెందిన వాడిననే నిజమైన భావనతో స్వీకరిస్తున్నాను" అని మోదీ తన పోస్ట్‌లో పేర్కొన్నారు. తాను ఇకపై గర్వంగా తన నివాసంగా భావించే ఈ దేశానికి సానుకూల సేవలు అందించడానికి ఎదురుచూస్తున్నట్లు వివరించారు.

ఐపీఎల్‌కు సంబంధించిన ఆర్థిక అవకతవకల ఆరోపణలపై దర్యాప్తు సంస్థలు విచారణ జరుపుతున్న నేపథ్యంలో 2010లో లలిత్ మోదీ భారత్ విడిచి వెళ్లిన విషయం తెలిసిందే. అప్పటి నుంచి ఆయన బ్రిటన్‌లోనే నివసిస్తున్నారు. సుమారు 16 ఏళ్ల తర్వాత ఆయనకు ఇప్పుడు బ్రిటిష్ పౌరసత్వం లభించడం గమనార్హం.

బ్రిటన్ రాజు కింగ్ చార్లెస్ III పుట్టినరోజున ఈ వార్తను పంచుకోవడం చాలా ప్రత్యేకమని లలిత్ మోదీ పేర్కొన్నారు. తనకు ఈ ప్రకటన చేసే అవకాశం కల్పించిన ఆక్స్‌ఫర్డ్ యూనియన్‌కు, తనకు మద్దతుగా నిలిచిన కుటుంబసభ్యులకు, స్నేహితులకు ఆయన కృతజ్ఞతలు తెలిపారు.