ఏపీ వెబ్‌ల్యాండ్ పోర్టల్ హ్యాకింగ్.. నలుగురి అరెస్ట్

ఆంధ్రప్రదేశ్‌లో భూ రికార్డుల నిర్వహణ వ్యవస్థ అయిన 'వెబ్‌ల్యాండ్' (Webland) పోర్టల్‌లో అక్రమ మార్పులకు పాల్పడిన ముఠా గుట్టును సీఐడీ అధికారులు రట్టు చేశారు. నిబంధనలకు విరుద్ధంగా ఆన్‌లైన్ రికార్డులను తారుమారు చేసి, నకిలీ పట్టాదారుల పేర్లను చేర్చిన వ్యవహారంలో నలుగురు నిందితులను సీఐడీ పోలీసులు అరెస్ట్ చేశారు.

ఈ కేసుకు సంబంధించిన వివరాల ప్రకారం.. ప్రకాశం జిల్లా దొనకొండ మండలంలోని ఇండ్లచెరువు, పడమర లక్ష్మీపురం గ్రామాల్లోని సుమారు 6.55 ఎకరాల భూమికి సంబంధించిన వెబ్‌ల్యాండ్ రికార్డుల్లో అనధికారికంగా మార్పులు జరిగాయి. స్థానిక తహసీల్దార్ కార్యాలయం నుంచి ఎటువంటి అధికారిక మ్యుటేషన్ ప్రొసీడింగ్స్ జారీ కాకపోయినప్పటికీ, ఆన్‌లైన్ రికార్డులలో కొత్త పట్టాదారుల పేర్లు ప్రత్యక్షమయ్యాయి. దీనిపై సమాచారం అందుకున్న అధికారులు లోతుగా పరిశీలించగా భారీ గోల్‌మాల్ జరిగినట్లు వెలుగులోకి వచ్చింది.

దర్యాప్తు చేపట్టిన సీఐడీ అధికారులు నిందితుల అక్రమాలను గుర్తించారు. నేషనల్ ఇన్ఫర్మేటిక్స్ సెంటర్ (NIC) కు చెందిన ఒక ఉన్నతాధికారి యూజర్ ఐడీని నిందితులు దుర్వినియోగం చేసినట్లు తేలింది. కంప్యూటర్ హ్యాకింగ్, అనధికారికంగా డేటాను డౌన్‌లోడ్ చేయడం, వైరస్ లేదా మాల్వేర్ ప్రవేశపెట్టడం, నెట్‌వర్క్ వ్యవస్థకు అంతరాయం కలిగించడం, రికార్డుల ఫోర్జరీ, మోసం వంటి తీవ్రమైన చర్యలకు పాల్పడినట్లు తేలడంతో పలు సెక్షన్ల కింద కేసులు నమోదు చేశారు.

ఈ అక్రమాలకు పాల్పడిన వడ్లమూడి ఏడుకొండలు, సాయికుమార్, వేముల వెంకట్రావు, షేక్ బాషా అనే నలుగురు వ్యక్తులను సీఐడీ అధికారులు అరెస్ట్ చేశారు. నిందితుల నుంచి మొబైల్ ఫోన్లు, డిజిటల్ లావాదేవీల వివరాలతో పాటు అడంగల్ భూ వివరాలు ఉన్న పవర్‌పాయింట్ ప్రజంటేషన్లను స్వాధీనం చేసుకున్నారు. వెబ్‌ల్యాండ్‌లో అక్రమంగా పేర్లు మార్చేందుకు నిందితులు పలువురి వద్ద నుంచి పెద్ద మొత్తంలో నగదు వసూలు చేసినట్లు ప్రాథమిక విచారణలో వెల్లడైంది. ఈ వ్యవహారంలో మరికొందరి ప్రమేయం కూడా ఉందని అధికారులు అనుమానిస్తున్నారు. ఈ నెట్‌వర్క్ వెనుక ఉన్న ఇతర వ్యక్తులను గుర్తించేందుకు దర్యాప్తు ముమ్మరంగా కొనసాగుతోంది.