ఆస్ట్రేలియాలో చరిత్ర సృష్టించిన భారత సంతతి వ్యక్తి.. గ్రేటర్ బెండిగో మేయర్‌గా అభిషేక్ అవస్థి

ఆస్ట్రేలియాలోని విక్టోరియా రాష్ట్రానికి చెందిన కీలక నగరం ‘గ్రేటర్ బెండిగో’ నూతన మేయర్‌గా భారత సంతతికి చెందిన అభిషేక్ అవస్థి (43) ఎన్నికయ్యారు. గ్రేటర్ బెండిగో సిటీ కౌన్సిల్‌కు మేయర్‌గా బాధ్యతలు చేపట్టిన మొట్టమొదటి భారత సంతతి వ్యక్తిగా ఆయన సరికొత్త చరిత్ర సృష్టించారు. నవంబర్ 9న జరిగిన సిటీ కౌన్సిల్ ప్రత్యేక సమావేశంలో 2026-27 కాలానికి గాను ఆయనను మేయర్‌గా ఏకగ్రీవంగా ఎన్నుకున్నారు.

అనంతరం స్థానిక ‘ది క్యాపిటల్ థియేటర్’లో నిర్వహించిన ప్రత్యేక కార్యక్రమంలో దాదాపు 250 మంది అతిథుల సమక్షంలో అభిషేక్ అవస్థి ప్రమాణ స్వీకారం చేశారు. ఆయన ఒక సంవత్సరం పాటు ఈ పదవిలో కొనసాగనున్నారు. కాగా, నగర డిప్యూటీ మేయర్‌గా ఆండ్రియా మెట్‌కాఫ్ ఎన్నికయ్యారు. గతంలో అభిషేక్ అవస్థి డిప్యూటీ మేయర్‌గా సమర్థవంతంగా సేవలందించిన విషయం తెలిసిందే.

మేయర్‌గా బాధ్యతలు స్వీకరించిన అనంతరం అభిషేక్ అవస్థి ప్రసంగిస్తూ, తనపై సంపూర్ణ నమ్మకం ఉంచి ఏకగ్రీవంగా ఎన్నుకున్న తోటి కౌన్సిలర్లందరికీ ప్రత్యేక ధన్యవాదాలు తెలిపారు. ఈ ఘనతను గ్రేటర్ బెండిగోను తమ సొంత నివాసంగా మార్చుకున్న వలసదారులందరికీ అంకితం చేస్తున్నట్లు ప్రకటించారు. తన ఎదుగుదలలో కీలక పాత్ర పోషించిన తల్లిదండ్రులు, కుటుంబ సభ్యులకు ఆయన కృతజ్ఞతలు తెలిపారు. ఈ ప్రాంత ప్రయోజనాల కోసం నిరంతరం గళమెత్తుతూ, ఉజ్వల భవిష్యత్తు నిర్మాణానికి కృషి చేస్తానని పేర్కొన్నారు. ఇదే విషయాన్ని ఆయన తన ఫేస్‌బుక్ ఖాతా ద్వారా కూడా పంచుకున్నారు.

విద్యార్థి స్థాయి నుంచి మేయర్ పీఠం దాకా..
భారతదేశంలోని హిమాచల్ ప్రదేశ్ రాష్ట్రానికి చెందిన మండి ప్రాంతం అభిషేక్ అవస్థి స్వస్థలం. ఆయన ఉత్తరప్రదేశ్ టెక్నికల్ యూనివర్సిటీ నుంచి బీటెక్ పూర్తి చేశారు. ఉన్నత విద్య కోసం 2008లో అంతర్జాతీయ విద్యార్థిగా ఆస్ట్రేలియా వెళ్లిన ఆయన, లా ట్రోబ్ యూనివర్సిటీలో బయోటెక్నాలజీ, బయోఇన్ఫర్మేటిక్స్ విభాగాలలో పోస్ట్ గ్రాడ్యుయేషన్ పూర్తి చేశారు. 2010లో బెండిగో నగరంలో స్థిరపడిన అవస్థి, 2015లో ఆస్ట్రేలియా పౌరసత్వం పొందారు.

స్థానిక కమ్యూనిటీలో చురుగ్గా పాల్గొంటూ, ప్రవాస భారతీయులను ఏకం చేయడానికి, సాంస్కృతిక, స్వచ్ఛంద కార్యక్రమాలు నిర్వహించడానికి ఆయన ‘ఇండియన్ అసోసియేషన్ ఆఫ్ బెండిగో’ను స్థాపించారు (దీనిని 2021లో అధికారికంగా నమోదు చేశారు). ప్రజలతో ఉన్న బలమైన అనుబంధంతో ఆయన 2024 నవంబర్‌లో ప్రత్యక్ష రాజకీయాల్లోకి అడుగుపెట్టారు. కెన్నింగ్టన్ వార్డు నుంచి కౌన్సిలర్‌గా ఘన విజయం సాధించి, 2024-25 కాలానికి నగరంలోనే తొలి భారత సంతతి డిప్యూటీ మేయర్‌గా సేవలందించారు. ఇప్పుడు అదే నగరానికి మేయర్‌గా ఎన్నికై అత్యున్నత పీఠాన్ని అధిరోహించారు.

ప్రస్తుతం అభిషేక్ అవస్థి తన భార్య అనిమ, కుమార్తె అగ్నితో కలిసి బెండిగోలో నివసిస్తున్నారు. భాక్రా బియాస్ మేనేజ్‌మెంట్ బోర్డ్ (బీబీఎంబీ) రిటైర్డ్ ఉద్యోగి అయిన ఆయన తండ్రి సురేంద్ర పాల్, తల్లి చంపా శర్మతో పాటు ఇతర బంధువులు కూడా ఈ ప్రమాణ స్వీకార వేడుకకు హాజరై సంతోషం వ్యక్తం చేశారు. విదేశీ గడ్డపై ఒక భారతీయుడు సాధించిన ఈ విజయం పట్ల సర్వత్రా ప్రశంసలు వ్యక్తమవుతున్నాయి.