పవన్ కల్యాణ్ వ్యక్తిగత వ్యవహారంపై టీడీపీ, వైసీపీ ప్రకటన.. పార్టీ కేడర్లకు కీల‌క ఆదేశాలు!

ఏపీ డిప్యూటీ సీఎం, జనసేన అధినేత పవన్ కల్యాణ్, ఆయన అర్ధాంగి అన్నా కొణిదెల తమ వైవాహిక బంధానికి ముగింపు పలుకుతున్నట్లు ప్రకటించడం తెలిసిందే. తాము పరస్పర అంగీకారంతో, గౌరవంతో విడిపోవాలని నిర్ణయించుకున్నామని ఒక ప్రకటనలో తెలిపారు. తమ పిల్లల పట్ల బాధ్యతాయుతమైన తల్లిదండ్రులుగా కొనసాగుతామని, స్నేహితులుగా ఉంటామని స్పష్టం చేశారు. ఈ సున్నితమైన సమయంలో తమ వ్యక్తిగత గోప్యతను గౌరవించాలని వారు కోరారు.

పవన్ కల్యాణ్ వ్యక్తిగత జీవితానికి సంబంధించిన ఈ పరిణామంపై అధికార కూటమిలో భాగమైన తెలుగుదేశం పార్టీ అనుబంధ విభాగం ఐటీడీపీ (iTDP) స్పందించింది. ఎవరి వ్యక్తిగత జీవితంపైనా స్పందించవద్దని పేర్కొంది. కూటమి పార్టీల నేతలతో పాటు వైసీపీ నేతల వ్యక్తిగత జీవితాలపై కూడా ఎలాంటి అనుచిత వ్యాఖ్యలు చేసినా సహించేది లేదని స్పష్టం చేసింది. ఐటీడీపీకి అనుబంధంగా ఉన్న ఏ సోషల్ మీడియా ఖాతా నుంచైనా ఇలాంటి వ్యాఖ్యలు వస్తే కఠిన క్రమశిక్షణా చర్యలు తీసుకుంటామని హెచ్చరించింది. ఇతరులను కించపరిచేలా చేసే వ్యక్తిగత అభిప్రాయాలతో తమకు ఎలాంటి సంబంధం లేదని స్పష్టం చేసింది.

అటు ప్రధాన ప్రతిపక్షమైన వైసీపీ కూడా హుందాగా స్పందించింది. రాజకీయ నాయకుల వ్యక్తిగత జీవితాలపై ఎలాంటి వ్యాఖ్యలు చేయవద్దని తమ పార్టీ నేతలు, కార్యకర్తలు, సోషల్ మీడియా విభాగాలకు స్పష్టమైన ఆదేశాలు జారీ చేసిందనేది ఆ ప్ర‌క‌ట‌న సారాంశం. 

"ఒక రాజకీయ నాయకుడి వ్యక్తిగత విషయానికి సంబంధించిన చర్చలు సోషల్ మీడియాలో జరుగుతున్నట్లు గమనించాము. ఇది పూర్తిగా వారి వ్యక్తిగత విషయం. కాబట్టి సంబంధిత వ్యక్తుల గోప్యతను గౌరవించాలి. బహిరంగ వేదికలపై మాట్లాడేటప్పుడు విచక్షణ పాటించాలి. ఈ విషయంలో పార్టీ నేతలు, ప్రతినిధులు, కేడర్, సోషల్ మీడియా కార్యకర్తలు కొన్ని సూచనలు పాటించాలి" అని ఆ ప్రకటనలో పేర్కొంది. 

సాధారణంగా రాజకీయ ప్రత్యర్థుల వ్యక్తిగత జీవితాలను లక్ష్యంగా చేసుకుని విమర్శలు, ట్రోలింగ్స్ జరిగే ప్రస్తుత రాజకీయాల్లో పవన్ విషయంలో వైసీపీ, టీడీపీ తీసుకున్న ఈ నిర్ణయం ఏపీ రాజకీయాల్లో ఒక కొత్త, ఆరోగ్యకరమైన సంప్రదాయానికి తెరలేపినట్లుగా రాజకీయ విశ్లేషకులు అభిప్రాయపడుతున్నారు. వ్యక్తిగత దాడులకు దూరంగా ఉంటూ, విధానపరమైన అంశాలపైనే దృష్టి సారించాలనే సందేశాన్ని ఈ పార్టీలు తమ కేడర్‌కు బలంగా పంపినట్లయింది.