చదివితే ఉద్యోగం ఖాయమనే రోజులు పోయాయా? చైనా ఉదాహరణతో భారత యువతకు వెంబు హెచ్చరిక

చదువుకుంటే మంచి ఉద్యోగం.. ఉద్యోగం వస్తే స్థిరమైన జీవితం.. ఇదే ఇప్పటివరకు యువతకు చెబుతున్న మాట. కానీ మారుతున్న పరిస్థితులు ఈ నమ్మకాన్ని ప్రశ్నిస్తున్నాయి. ఆర్టిఫిషియల్‌ ఇంటెలిజెన్స్‌ (ఏఐ), ఆటోమేషన్‌ కారణంగా సంప్రదాయ ఉద్యోగాలకు సవాళ్లు పెరుగుతున్నాయి. ఈ నేపథ్యంలో చైనాలో నిరుద్యోగ సమస్యను ప్రస్తావిస్తూ జోహో వ్యవస్థాపకుడు శ్రీధర్‌ వెంబు కీలక వ్యాఖ్యలు చేశారు. యువత ఉద్యోగాలపైనే ఆధారపడకుండా వ్యాపారాలు, స్వయం ఉపాధి దిశగా అడుగులు వేయాలని సూచించారు.

చైనాలో యువత నిరుద్యోగ సమస్యపై సామాజిక మాధ్యమం ఎక్స్‌లో జరుగుతున్న చర్చకు వెంబు స్పందించారు. దశాబ్దాలుగా అక్కడి యువతకు ఒక భరోసా ఇచ్చారని పేర్కొన్నారు. బాగా చదివితే మంచి ఉద్యోగం వస్తుందని, తల్లిదండ్రుల కంటే మెరుగైన జీవితం గడపవచ్చని నమ్మించారని గుర్తుచేశారు. అయితే ఆ భరోసా ఇప్పుడు క్రమంగా దెబ్బతింటోందన్నారు.

ప్రపంచానికి తయారీ కేంద్రంగా ఉన్న చైనా.. అనేక రంగాల్లో సాంకేతికంగా అభివృద్ధి సాధించిందని వెంబు పేర్కొన్నారు. ఏటా 1.2 లక్షల కోట్ల డాలర్ల సరుకుల వాణిజ్య మిగులును నమోదు చేస్తున్నప్పటికీ.. పట్టభద్రులైన యువతకు తగిన ఉద్యోగాలు కల్పించలేకపోతోందని వివరించారు. చైనాలో 20-24 ఏళ్ల వయసున్న నిరుద్యోగుల్లో దాదాపు 70 శాతం మంది యూనివర్సిటీ డిగ్రీలు పొందినవారేనని తెలిపారు.

ప్రపంచవ్యాప్తంగా విద్యా, ఆర్థిక వ్యవస్థలు స్థిరమైన జీతం వచ్చే ఉద్యోగాల కోసమే యువతను సిద్ధం చేస్తున్నాయని వెంబు అన్నారు. అయితే ఆటోమేషన్‌, ఏఐ కారణంగా అలాంటి ఉద్యోగాలకే ముప్పు పెరుగుతోందని హెచ్చరించారు. రాబోయే రోజుల్లో ఈ సమస్య మరింత తీవ్రమయ్యే అవకాశం ఉందన్నారు.

ఈ పరిస్థితిని ఎదుర్కోవాలంటే వ్యాపారవేత్తల సంఖ్య పెరగాలని, స్వయం ఉపాధికి ప్రాధాన్యం ఇవ్వాలని వెంబు సూచించారు. అమెరికాలోనూ 20వ శతాబ్దం మధ్యకాలానికి ముందు చిన్న వ్యాపారాలు, స్వయం ఉపాధి ఆర్థికాభివృద్ధికి ప్రధాన ఆధారంగా నిలిచాయని గుర్తుచేశారు. భారీ సంస్థల్లో స్థిరమైన జీతాల ఉద్యోగాలు ఆధిపత్యం చెలాయించడం ఇటీవలి పరిణామమేనని పేర్కొన్నారు. ఈ మార్పులను గుర్తించి భారత విధాన నిర్ణేతలు తగిన చర్యలు తీసుకోవాలని సూచించారు.