5 అడుగుల 3 అంగుళాల గడ్డంతో గిన్నిస్ రికార్డ్.. ఈయన కథే వేరు!

ప్రపంచంలో ఎందరో వింతైన అలవాట్లు, రూపాలతో అందరి దృష్టిని ఆకర్షిస్తుంటారు. సరిగ్గా ఇలాంటి కోవలోకే వస్తారు అమెరికాకు చెందిన 54 ఏళ్ల మాథ్యూ హే. తన అసాధారణమైన గడ్డంతో ఏకంగా గిన్నిస్ వరల్డ్ రికార్డును సొంతం చేసుకున్నారు. ప్రపంచంలోనే అత్యంత పొడవైన సహజ గడ్డం జడ కలిగిన వ్యక్తిగా ఆయన రికార్డు పుటల్లోకి ఎక్కారు. ఆయన గడ్డం పొడవు ఏకంగా 5 అడుగుల 3 అంగుళాలు (1.603 మీటర్లు) ఉండటం విశేషం.

అమెరికాలోని కాన్సాస్‌కు చెందిన మాథ్యూ, ఈ ఘనతతో గత రికార్డును సునాయాసంగా అధిగమించారు. ఇంతకుముందు రుడాల్ఫ్ మార్టినో పేరిట 3 అడుగుల 6 అంగుళాల పొడవుతో ఈ రికార్డు ఉండేది. అయితే, సహజంగా పెరిగిన గడ్డం జడకు, సాధారణ గడ్డానికి మధ్య తేడా ఉందని గిన్నిస్ రికార్డ్స్ స్పష్టం చేసింది. అత్యంత పొడవైన గడ్డం రికార్డు ఇప్పటికీ కెనడాకు చెందిన సర్వాన్ సింగ్ పేరిట (8 అడుగుల 3 అంగుళాలు) ఉంది.

రికార్డు వెనుక రెండు దశాబ్దాల ప్రయాణం
మాథ్యూ హే సుమారు 20 ఏళ్లుగా ఈ గడ్డాన్ని పెంచుతున్నారు. మొదట్లో చిన్న గడ్డంతోనే ఉండే ఆయన, ఓసారి కొందరు పిల్లలు తన గడ్డాన్ని జడలా అల్లమని అడగడంతో సరదాగా అంగీకరించారు. ఆ తర్వాత ఆ లుక్ ఆయనకు నచ్చడంతో గడ్డం కత్తిరించడం మానేశారు. కాలక్రమేణా అది సహజంగానే ఒకే జడగా మారిపోయింది. ప్రతి ఏటా సుమారు 3 నుంచి 4 అంగుళాల మేర పెరుగుతూ వచ్చింది. చివరికి అది ఎంత పొడవుగా పెరిగిందంటే, దాన్ని నడుము చుట్టూ బెల్టులా చుట్టుకునే స్థాయికి చేరుకుంది.

ఈ రికార్డుపై మ్యాథ్యూ స్పందిస్తూ, తన గడ్డం తనను నిర్వచించదని స్పష్టం చేశారు. "మీ గడ్డమే మీ గుర్తింపా?" అని ఓ అమ్మాయి అడిగిన ప్రశ్నకు, "అస్సలు కాదు" అని సమాధానమిచ్చినట్లు ఆయన గిన్నిస్ రికార్డ్స్ ప్రతినిధులతో పంచుకున్నారు. "నేను ఏదో చేసినందుకు ఈ గడ్డం రాలేదు, దాన్ని ఏమీ చేయకుండా చేయకుండా వదిలేసినందుకు వచ్చింది" అంటూ గడ్డం కత్తిరించకపోవడాన్ని ఉద్దేశించి వ్యాఖ్యానించారు.

గడ్డం మాత్రమే కాదు.. ఎన్నో హాబీలు
ఈ అరుదైన గడ్డం కారణంగా బయట అందరి దృష్టిని ఆకర్షిస్తున్నప్పటికీ, తనకు అంతకుమించి ఎన్నో ఇష్టాలు ఉన్నాయని మాథ్యూ తెలిపారు. ఆయనకు కార్లు, కంప్యూటర్ల పట్ల అమితమైన ఆసక్తి ఉంది. ముఖ్యంగా మజ్దా RX-7 స్పోర్ట్స్ కార్లు, అమిగా కంప్యూటర్లంటే ఆయనకు ఎంతో ఇష్టం. వీటితో పాటు వెయిట్‌లిఫ్టింగ్, వీడియో గేమ్స్ ఆడటం, కుటుంబ సభ్యులతో సమయం గడపడం వంటివి ఆయన హాబీలు. "నా స్నేహితులు నన్ను గడ్డం కంటే ఎక్కువగా ఈ హాబీల ద్వారానే గుర్తుపడతారు" అని ఆయన అన్నారు.

ప్రస్తుతానికి ఈ గడ్డాన్ని కత్తిరించే ఆలోచన లేదని మాథ్యూ స్పష్టం చేశారు. దానికి సరళమైన షాంపూ, కండిషనర్ వాడటం తప్ప ప్రత్యేక శ్రద్ధ ఏదీ తీసుకోనని తెలిపారు. పొడవుగా ఉండటంతో రోజువారీ పనులకు ఇబ్బంది కలగకుండా దాన్ని పలుమార్లు మడిచి కట్టుకుంటారు. తన రూపాన్ని చూసి కొందరు విమర్శించినా, ప్రజలు ఒకరినొకరు వారి రూపంతో సంబంధం లేకుండా గౌరవించుకోవాలని ఆయన సందేశమిచ్చారు. "నో-షేవ్ నవంబర్" స్ఫూర్తితో గడ్డం పెంచాలనుకునే వారికి "ఆన్ యువర్ మార్క్స్, గెట్ సెట్, గ్రో... అండ్ బీ బ్లెస్డ్!" అంటూ సరదాగా చెప్పుకొచ్చారు.