భారతీయ సినీ చరిత్రలోనే అత్యంత భారీ బడ్జెట్‌తో, ఎన్నో అంచనాల మధ్య విడుదలైన 'రామాయణ' చిత్రం తొలిరోజు బాక్సాఫీస్ వద్ద మంచి వసూళ్లనే సాధించింది. రణ్‌బీర్ కపూర్, సాయి పల్లవి ప్రధాన పాత్రల్లో నితీష్ తివారీ దర్శకత్వంలో తెరకెక్కిన ఈ చిత్రం, నిన్న‌ ప్రపంచవ్యాప్తంగా విడుదలైంది. సినిమాకు మంచి స్పందన లభించినప్పటికీ, మొదటి రోజు ఇండియాలో రూ. 65 కోట్ల నెట్ వసూళ్లను మాత్ర‌మే రాబట్టింది. అయితే, ట్రేడ్ పండితులు అంచనా వేసిన రూ. 100 కోట్ల మార్కును మాత్రం అందుకోలేకపోయింది.

ట్రేడ్ ట్రాకర్ 'సాక్నిల్క్' ప్ర‌కారం వివిధ భాషల్లో వసూళ్ల వివరాలు చూస్తే.. హిందీలో అత్యధికంగా రూ. 47.50 కోట్లు కలెక్ట్ చేసింది. ఆ తర్వాత కన్నడలో రూ. 7.25 కోట్లు, తెలుగులో రూ. 6 కోట్లు, తమిళంలో రూ. 2.60 కోట్లు, మలయాళంలో రూ. 1.50 కోట్లు వచ్చాయి. ఇండియా గ్రాస్ రూ. 77.50 కోట్లుగా నమోదైంది. ఓవర్సీస్‌లో మరో రూ. 50 కోట్లు గ్రాస్ సాధించడంతో ప్రపంచవ్యాప్తంగా తొలిరోజు మొత్తం గ్రాస్ కలెక్షన్ రూ. 127.50 కోట్లకు చేరింది.

గత చిత్రాలతో పోలిస్తే, రణ్‌బీర్ చివరి చిత్రం 'యానిమల్' (రూ. 63.80 కోట్లు) తొలిరోజు వసూళ్లను 'రామాయణ' అధిగమించింది. అలాగే, షారుఖ్ ఖాన్ 'పఠాన్' (రూ. 57 కోట్లు) కంటే ఎక్కువ ఓపెనింగ్ సాధించినప్పటికీ, 'జవాన్' (రూ. 75 కోట్లు) రికార్డును మాత్రం అందుకోలేకపోయింది. దాదాపు రూ. 4,000 కోట్ల బడ్జెట్‌తో రూపొందిన ఈ చిత్రం(రెండు పార్టులుగా)లో యశ్, సన్నీ డియోల్ వంటి తారలు కీలక పాత్రలు పోషించారు.