బంగ్లాదేశ్‌లో మళ్లీ భారత్‌ వ్యతిరేక నినాదాలు.. తారిఖ్‌ రెహ్మాన్‌ ప్రభుత్వంపై నిరసనలు

బంగ్లాదేశ్‌లో మరోసారి భారత్‌ వ్యతిరేక నినాదాలు మార్మోగాయి. దేశంలో పెరుగుతున్న నిత్యావసర వస్తువుల ధరలు, విద్యుత్‌ కోతలు, ఇంధనం, గ్యాస్‌ కొరతపై ప్రధాని తారిఖ్‌ రెహ్మాన్‌ నేతృత్వంలోని ప్రభుత్వానికి వ్యతిరేకంగా నిరసనలు వెల్లువెత్తాయి. హోం, ఇంధన శాఖల మంత్రులు రాజీనామా చేయాలని పార్టీ నేతలు డిమాండ్‌ చేశారు. ఈ ఆందోళనల్లో భాగంగా నేషనల్‌ సిటిజన్‌ పార్టీ (ఎన్‌సీపీ) నిర్వహించిన భారీ ర్యాలీలో భారత్‌కు వ్యతిరేకంగా నినాదాలు చేశారు.  

ఢాకాలోని నేషనల్‌ మ్యూజియం ఎదుట శుక్రవారం ఈ ర్యాలీ నిర్వహించారు. ఎన్‌సీపీ కన్వీనర్‌ నహీద్‌ ఇస్లాం నేతృత్వంలో జరిగిన ఈ కార్యక్రమంలో వేలాది మంది పాల్గొన్నారు. ‘ఢిల్లీ కాదు.. ఢాకా’ అంటూ నేతలు నినాదాలు చేయగా, సభకు హాజరైనవారు ‘ఢాకా.. ఢాకా’ అంటూ స్పందించినట్లు సామాజిక మాధ్యమాల్లో ప్రచారమైన వీడియోలు చూపించాయి. 2024లో షేక్‌ హసీనా ప్రభుత్వాన్ని గద్దె దించిన విద్యార్థుల ఉద్యమం నుంచి ఎన్‌సీపీ ఆవిర్భవించింది. 

ర్యాలీలో నహీద్‌ ఇస్లాం భారత్‌పై ఆరోపణలు చేశారు. బంగ్లాదేశ్‌కు వ్యతిరేకంగా భారత్‌ కుట్రలు చేస్తోందని, సరిహద్దుల్లో హత్యలు జరుగుతున్నాయని ఆరోపించారు. అసోం, పశ్చిమ బెంగాల్‌లో ముస్లింలపై వేధింపులు జరుగుతున్నాయని, ఢిల్లీలో మసీదులను కూల్చేందుకు ప్రయత్నాలు జరుగుతున్నాయని కూడా పేర్కొన్నారు. అయితే, ఈ ఆరోపణలకు ఆధారాలను ఆయన చూపలేదని కథనం వెల్లడించింది. గంగా జలాల ఒప్పందాన్ని న్యాయంగా పునరుద్ధరించకపోతే మరోసారి ఆందోళనలు చేపడతామని హెచ్చరించారు. భారత్‌-బంగ్లాదేశ్‌ మధ్య కుదిరిన 30 ఏళ్ల గంగా జలాల ఒప్పందం ఈ ఏడాది డిసెంబరుతో ముగియనుంది. 

బంగ్లాదేశ్‌లో గత కొన్ని నెలలుగా ఇంధన సంక్షోభం తీవ్రతరమైంది. మధ్యప్రాచ్యంలో నెలకొన్న పరిణామాల కారణంగా ఇంధన సరఫరాకు అంతరాయాలు ఏర్పడ్డాయి. బంగ్లాదేశ్‌ తన చమురు అవసరాల్లో 90 శాతానికి పైగా, గ్యాస్‌ అవసరాల్లో 30 శాతం దిగుమతులపైనే ఆధారపడుతోంది. విద్యుత్‌ కోతలతో వస్త్ర పరిశ్రమల్లో ఉత్పత్తి కూడా దెబ్బతింటోంది. 2026లో ద్రవ్యోల్బణం సుమారు 8.5 శాతంగా ఉండటంతో ప్రజలపై ధరల భారం పెరిగింది. గత ఏడాదితో పోలిస్తే మరో 21 లక్షల మంది పేదరికంలోకి వెళ్లినట్లు ప్రపంచ బ్యాంకు నివేదిక వెల్లడించింది.

ఈ పరిస్థితులకు ప్రభుత్వమే బాధ్యత వహించాలని నహీద్‌ ఇస్లాం డిమాండ్‌ చేశారు. హోం మంత్రి సలాహుద్దీన్‌ అహ్మద్‌, ఇంధన మంత్రి ఇక్బాల్‌ హసన్‌ మహమూద్‌ రాజీనామా చేయాలని కోరారు. వారు పదవుల నుంచి తప్పుకోకపోతే దేశవ్యాప్తంగా ఆందోళనలు చేపట్టి, ప్రధాని తారిఖ్‌ రెహ్మాన్‌ నివాసాన్ని ముట్టడిస్తామని హెచ్చరించారు. దేశీయ సమస్యలపై మొదలైన ఈ నిరసనల్లో భారత్‌ వ్యతిరేక నినాదాలు కూడా వినిపించడం ఇరు దేశాల మధ్య ఇప్పటికే ఒడుదొడుకులకు లోనైన సంబంధాలపై మరోసారి చర్చకు దారితీసింది.