ప్రఖ్యాత వంటల నిపుణుడు, టెలివిజన్ ద్వారా కోట్లాది మందికి సుపరిచితులైన కె. దామోదరన్ (72) కన్నుమూశారు. ‘చెఫ్ దాము’గా ప్రపంచవ్యాప్తంగా గుర్తింపు పొందిన ఆయన, అక్టోబర్ 25న చెన్నైలో తుదిశ్వాస విడిచారు. ఆయన మృతి పట్ల తమిళనాడు ముఖ్యమంత్రి విజయ్ తీవ్ర దిగ్భ్రాంతి వ్యక్తం చేశారు. చెఫ్ దాము కుటుంబ సభ్యులకు తన ప్రగాఢ సానుభూతిని తెలిపారు.

ఈ సందర్భంగా సీఎం విజయ్ ఒక సంతాప సందేశాన్ని విడుదల చేశారు. చెఫ్ దాము మరణంతో పాకశాస్త్ర ప్రపంచం ఒక మహోన్నత వ్యక్తిని కోల్పోయిందని ఆవేదన వ్యక్తం చేశారు. తనదైన ప్రత్యేక శైలితో, టెలివిజన్ కార్యక్రమాల ద్వారా వంటల కళను సామాన్య ప్రజలకు సైతం చేరువ చేసిన ఘనత చెఫ్ దాముకే దక్కుతుందని ఆయన కొనియాడారు. వంటగదికే పరిమితమైన కళను ప్రపంచానికి పరిచయం చేసిన గొప్ప వ్యక్తి అని ప్రశంసించారు.

చెఫ్ దాము అందుకున్న ప్రతిష్ఠాత్మక పద్మశ్రీ పురస్కారాన్ని, ఆయన నెలకొల్పిన గిన్నిస్ వరల్డ్ రికార్డును సీఎం విజయ్ ఈ సందర్భంగా గుర్తు చేసుకున్నారు. ఆయన సేవలు ఎప్పటికీ చిరస్మరణీయంగా నిలిచిపోతాయన్నారు. చెఫ్ దాము కుటుంబ సభ్యులు, స్నేహితులు, ప్రపంచవ్యాప్తంగా ఉన్న ఆయన అభిమానులందరికీ తన ప్రగాఢ సంతాపాన్ని తెలియజేస్తున్నట్లు సీఎం విజయ్ పేర్కొన్నారు.