సీనియర్ నటుడు, యాక్షన్ కింగ్ అర్జున్ ఇంట పెళ్లి సందడి నెలకొంది. ఆయన చిన్న కుమార్తె అంజన వివాహ బంధంలోకి అడుగుపెట్టారు. దాదాపు 14 ఏళ్లుగా తాను ప్రేమిస్తున్న ఇసాయ్ నట్టర్‌ను ఆమె పెళ్లాడారు. ఈ నెల 19న విదేశాల్లో వీరి వివాహం హిందూ సంప్రదాయం ప్రకారం వైభవంగా జరిగింది. తాజాగా తన పెళ్లికి సంబంధించిన ఫోటోలను అంజన సోషల్ మీడియాలో పంచుకోవడంతో ఈ విషయం వెలుగులోకి వచ్చింది.

"టు ఫరెవర్. 19.10.2026 #14yearslater" అనే క్యాప్షన్‌తో ఆమె ఈ ఫోటోలను షేర్ చేశారు. ఈ ఫోటోలలో అంజన లేత గులాబీ రంగు సంప్రదాయ దుస్తుల్లో, ఇసాయ్ మ్యాచింగ్ షేర్వాణీలో మెరిసిపోతున్నారు. కుటుంబ సభ్యులు, అత్యంత సన్నిహితుల నడుమ ఈ వివాహ వేడుక జరిగినట్లు తెలుస్తోంది.

అమెరికాలో ఉన్నత విద్యను అభ్యసిస్తున్న సమయంలో అంజన, ఇసాయ్‌లకు పరిచయం ఏర్పడింది. ఆ పరిచయం ప్రేమగా మారి, 14 ఏళ్లుగా కొనసాగింది. గతేడాది ఇటలీలోని లేక్ కోమోలో వీరి నిశ్చితార్థం జరగ్గా, ఇప్పుడు పెళ్లితో ఒక్కటయ్యారు.

అర్జున్ పెద్ద కుమార్తె ఐశ్వర్య నటిగా రాణిస్తుండగా, చిన్న కుమార్తె అంజన మాత్రం నటనకు దూరంగా వ్యాపార రంగంలో స్థిరపడ్డారు. 'సర్జా వరల్డ్' పేరుతో ఓ సంస్థను స్థాపించి సీఈఓగా బాధ్యతలు నిర్వర్తిస్తున్నారు. ఇటీవలే ఐశ్వర్య వివాహం నటుడు ఉమాపతి రామయ్యతో జరిగిన విషయం తెలిసిందే. ప్రస్తుతం అంజన షేర్ చేసిన పెళ్లి ఫోటోలు సోషల్ మీడియాలో వైరల్ అవుతున్నాయి. నూతన వధూవరులకు పలువురు ప్రముఖులు, అభిమానులు శుభాకాంక్షలు తెలుపుతున్నారు.