భోగాపురంలో దారుణం: డబ్బులివ్వలేదని యువకుడికి తాళ్లు కట్టి, బైక్‌తో లాక్కెళ్లిన మెకానిక్

జిల్లాలోని భోగాపురంలో అమానుష ఘటన చోటుచేసుకుంది. చిన్నపాటి నగదు బాకీ కోసం ఓ యువకుడి మెడకు, చేతులకు తాళ్లు కట్టి, నడిరోడ్డుపై ఈడ్చుకెళ్లిన దారుణం స్థానికంగా కలకలం రేపింది. బాధితుడి ఫిర్యాదుతో తీవ్రంగా స్పందించిన పోలీసులు, ఈ ఘటనకు పాల్పడిన ప్రధాన నిందితుడు మహేశ్‌తో సహా మొత్తం ఐదుగురిని అరెస్ట్ చేసి కఠిన సెక్షన్ల కింద కేసులు నమోదు చేశారు.

పోలీసుల కథనం ప్రకారం, రామచంద్రరాజుపేటకు చెందిన రాజేశ్ అనే యువకుడు, భోగాపురంలోని మహేశ్ అనే మెకానిక్ వద్ద ఓ బైక్‌ను ట్రయల్ రన్ చేస్తుండగా ప్రమాదవశాత్తు ఓ కారును ఢీకొట్టాడు. దానికి అయిన మరమ్మతుల ఖర్చును మహేశ్ సోదరుడు చెల్లించగా, ఆ డబ్బును రాజేశ్ తిరిగి ఇవ్వడంలో ఆలస్యం చేశాడు. ఈ క్రమంలో శనివారం రాత్రి మహేశ్, తన స్నేహితులతో కలిసి రాజేశ్ ను అడ్డగించి, బలవంతంగా ఓ మెకానిక్ షెడ్‌కు తీసుకెళ్లారు. రాత్రంతా అక్కడే నిర్బంధించి, చితకబాది, రూ. 30,000 ఇవ్వాలని డిమాండ్ చేశారు.

అంతటితో ఆగకుండా, ఆదివారం ఉదయం రాజేశ్ చొక్కా విప్పించి, చేతులకు, మెడకు తాళ్లు బిగించి భోగాపురం వీధుల్లో బైక్‌కు కట్టి ఈడ్చుకెళ్లారు. ఈ అమానుష దృశ్యాన్ని చూసి చలించిన స్థానికులు పోలీసులకు సమాచారం అందించారు.

విషయం తెలుసుకున్న జిల్లా ఎస్పీ ఏఆర్ దామోదర్ హుటాహుటిన భోగాపురం చేరుకుని పరిస్థితిని సమీక్షించారు. గంటల వ్యవధిలోనే నిందితులు ఐదుగురినీ అదుపులోకి తీసుకున్నామని ఆయన తెలిపారు. నిందితులపై హత్యాయత్నం (అటెంప్ట్ మర్డర్), ఎస్సీ, ఎస్టీ అట్రాసిటీ చట్టంతో పాటు ఇతర నాన్-బెయిలబుల్ సెక్షన్ల కింద కేసులు నమోదు చేసినట్లు ఎస్పీ స్పష్టం చేశారు. నిందితులకు కఠిన శిక్ష పడేలా చూస్తామని ఆయన హామీ ఇచ్చారు. ప్రస్తుతం నిందితులందరినీ అరెస్ట్ చేసి రిమాండ్‌కు తరలించేందుకు ఏర్పాట్లు చేస్తున్నారు. ఈ ఘటనపై తదుపరి విచారణ కొనసాగుతోంది.