సౌత్ సూపర్ స్టార్ల ఫుడ్ మిక్సప్.. బిగ్ బాస్ కొత్త ప్రోమో అదుర్స్!

దక్షిణాది నాలుగు చిత్ర పరిశ్రమలకు చెందిన అగ్ర తారలు ఒకే ప్రోమోలో కనిపించి ప్రేక్షకులను ఆశ్చర్యపరిచారు. ప్రముఖ రియాలిటీ షో ‘బిగ్ బాస్’ ప్రాంతీయ ఎడిషన్ల కోసం రూపొందించిన సరికొత్త ప్రోమోలో కింగ్ నాగార్జున, మక్కల్ సెల్వన్ విజయ్ సేతుపతి, కన్నడ స్టార్ కిచ్చా సుదీప్, మలయాళ మెగాస్టార్ మోహన్‌లాల్ సందడి చేశారు. సోమవారం విడుదలైన ఈ ప్రోమో సోషల్ మీడియాలో వైరల్‌గా మారింది.

ఈ ప్రోమోను దక్షిణాది రాష్ట్రాల సంస్కృతులను, ఆహారపు అలవాట్లను ప్రతిబింబించేలా సరదాగా చిత్రీకరించారు. ఇందులో నలుగురు హోస్టులు ఒకరి రాష్ట్రానికి చెందిన ఆహారాన్ని మరొకరు పొందడంతో తలెత్తిన గందరగోళాన్ని, వారి మధ్య జరిగిన ఫన్నీ సంభాషణలను చూపించారు. దక్షిణాది మార్కెట్లను, వారి సంస్కృతులను గౌరవిస్తూ ఈ ప్రోమోను రూపొందించడం విశేషం.

బిగ్ బాస్ షోలో కంటెస్టెంట్ల ఆట ఎంత ఆసక్తికరంగా ఉంటుందో, వారాంతాల్లో హోస్టుల విశ్లేషణలు, వారి జోక్యాలు కూడా అంతే కీలకంగా ఉంటాయి. ఈ నలుగురు హోస్టులకు వారి వారి భాషల్లో ఉన్న ఫాలోయింగ్ షో విజయానికి ప్రధాన కారణం. ఈ నేపథ్యంలోనే నిర్వాహకులు ఈ నలుగురినీ ఒకేచోట చేర్చి అభిమానులకు సర్‍ప్రైజ్ ఇచ్చారు.

ఈ సందర్భంగా జియోస్టార్ ఎంటర్‌టైన్‌మెంట్ (సౌత్) హెడ్ కృష్ణన్ కుట్టీ మాట్లాడుతూ, "ప్రతి హోస్ట్‌కు తమ ప్రేక్షకులతో ఒక ప్రత్యేకమైన అనుబంధం ఉంటుంది. అదే బిగ్ బాస్‌ను ప్రతీ మార్కెట్‌లో శక్తివంతంగా నిలబెడుతుంది. విజయ్ సేతుపతి, నాగార్జున, కిచ్చా సుదీప్, మోహన్‌లాల్‌లను ఒకే ఫ్రేమ్‌లో తీసుకురావడం ద్వారా షోపై ఉన్న అంచనాలను రెట్టింపు చేశాం. ఇది అభిమానులకు ఒక పండగ లాంటిది" అని వివరించారు.

బిగ్ బాస్ తెలుగు, తమిళం, కన్నడ, మలయాళం ఎడిషన్లు సెప్టెంబర్ 6, 2026 నుంచి జియోస్టార్ టెలివిజన్ ఛానెళ్లు మరియు జియోహాట్‌స్టార్‌లో ఏకకాలంలో ప్రసారం కానున్నాయి. ఎండెమోల్ షైన్, బనిజయ్ ఎంటర్‌టైన్‌మెంట్ ఈ ఫార్మాట్‌కు హక్కుదారుగా ఉన్నాయి.