స్వాతంత్ర్య దినోత్సవ వేడుకల్లో ప్రత్యేక ఆకర్షణగా త్రిష.. సీఎం విజయ్ తల్లిదండ్రుల పక్కనే ఫ్రంట్ రోలో చోటు!

తమిళనాడు ముఖ్యమంత్రిగా సి. జోసెఫ్ విజయ్ తొలిసారిగా జాతీయ జెండాను ఎగురవేసిన స్వాతంత్ర్య దినోత్సవ వేడుకలకు ప్రముఖ నటి త్రిష కృష్ణన్ హాజరై ప్రత్యేక ఆకర్షణగా నిలిచారు. చెన్నైలోని ఫోర్ట్ సెయింట్ జార్జ్‌లో శనివారం జరిగిన 80వ స్వాతంత్ర్య దినోత్సవ కార్యక్రమంలో, విజయ్ తల్లిదండ్రులైన ఎస్.ఎ. చంద్రశేఖర్, శోభా చంద్రశేఖర్ పక్కనే ముందు వరుసలో త్రిష ఆసీనురయ్యారు.

ఈ కార్యక్రమానికి త్రిష తన తల్లి ఉమా కృష్ణన్‌తో కలిసి వచ్చారు. పసుపు రంగు చీరలో సంప్రదాయబద్ధంగా కనిపించిన ఆమె, పరేడ్ సందర్భంగా సీఎం విజయ్ జీపులో వెళ్తుండగా సెల్యూట్ చేస్తూ కనిపించారు. కార్యక్రమం జరుగుతున్నంత సేపు ఆమె తన పక్కనున్న వారితో మాట్లాడుతూ నవ్వుతూ కనిపించిన వీడియోలు, ఫొటోలు సోషల్ మీడియాలో వైరల్ అయ్యాయి.

విజయ్‌కు సంబంధించిన అధికారిక కార్యక్రమంలో త్రిష ఇలా ముందు వరుసలో కనిపించడం ఇది రెండోసారి. ఈ ఏడాది మే నెలలో చెన్నైలోని జవహర్‌లాల్ నెహ్రూ స్టేడియంలో జరిగిన విజయ్ ప్రమాణస్వీకార మహోత్సవానికి కూడా ఆమె హాజరై ముందు వరుసలోనే కూర్చున్నారు.

‘తమిళగ వెట్రి కళగం’ (టీవీకే) పార్టీ వ్యవస్థాపకుడైన విజయ్, ముఖ్యమంత్రిగా తన తొలి స్వాతంత్ర్య దినోత్సవ ప్రసంగంలో అవినీతి నిర్మూలనే నిజమైన స్వేచ్ఛ అని పేర్కొన్నారు. పరిపాలన విషయాల్లో కేంద్రంతో కలిసి పనిచేస్తామని, అదే సమయంలో రాష్ట్ర హక్కులను కాపాడుకుంటామని స్పష్టం చేశారు. ‘జన నాయగన్’ తన చివరి చిత్రమని ప్రకటించిన విజయ్, ఇప్పుడు పూర్తిస్థాయి రాజకీయాలపై దృష్టి సారించారు. వెండితెరపై విజయవంతమైన జోడీగా పేరుపొందిన విజయ్, త్రిష.. ఇప్పుడు ఇలా రాజకీయ కార్యక్రమాల్లోనూ కలిసి కనిపించడంపై సర్వత్రా ఆసక్తి నెలకొంది.