ధోనీ పర్యవేక్షణలో పంత్.. శ్రీలంక సిరీస్‌కు స్పెషల్ ట్రైనింగ్

టీమిండియా స్టార్ వికెట్ కీపర్-బ్యాటర్ రిషబ్ పంత్ త్వరలో శ్రీలంకతో జరగనున్న రెండు మ్యాచ్‌ల టెస్ట్ సిరీస్ కోసం తన సన్నాహకాలను ప్రారంభించాడు. ఇందులో భాగంగా భారత జట్టు మాజీ కెప్టెన్ ఎంఎస్ ధోనీతో కలిసి రాంచీలో ప్రత్యేకంగా శిక్షణ తీసుకుంటున్నాడు. వీరిద్దరూ జిమ్‌లో ఉన్న ఫొటోను మాజీ స్పిన్నర్ షాబాజ్ నదీమ్ సోషల్ మీడియాలో పంచుకున్నారు. "భారత క్రికెట్‌లోని ఇద్దరు అత్యుత్తమ ఫినిషర్లు" అంటూ నదీమ్ ఈ ఫొటోకు క్యాప్షన్ పెట్టాడు.

ప్రస్తుతం పంత్ భారత వైట్-బాల్ జట్లలో సభ్యుడిగా లేనప్పటికీ, శుభ్‌మన్ గిల్ కెప్టెన్సీలోని టెస్టు జట్టులో మాత్రం కీలక ఆటగాడిగా కొనసాగుతున్నాడు. ఇటీవల ముగిసిన ఐపీఎల్ 2026లో లక్నో సూపర్ జెయింట్స్ కెప్టెన్‌గా పంత్ విఫలమయ్యాడు. ఆ టోర్నీలో 28.36 సగటుతో కేవలం 312 పరుగులు మాత్రమే చేయగా, లక్నో జట్టు పాయింట్ల పట్టికలో చివరి స్థానంలో నిలిచింది. ఆ జ‌ట్టుకు కూడా గుడ్‌బై చెప్పిన పంత్ ఢిల్లీ క్యాపిట‌ల్స్‌లో చేరాడు. ఈ నేపథ్యంలో శ్రీలంక సిరీస్ అతనికి కీలకం కానుంది.

ప్రపంచ టెస్ట్ ఛాంపియన్‌షిప్ ఫైనల్ రేసులో నిలవాలంటే భారత్ రాబోయే 9 టెస్టుల్లో కనీసం 7 గెలవాల్సి ఉంది. ఈ క్రమంలో శ్రీలంకపై 2-0 తేడాతో సిరీస్ గెలవడం చాలా ముఖ్యం.

మరోవైపు గాయం కారణంగా ఎంఎస్ ధోనీ ఐపీఎల్ 2026 సీజన్ మొత్తానికి దూరమయ్యాడు. చెన్నై సూపర్ కింగ్స్ హెడ్ కోచ్‌గా స్టీఫెన్ ఫ్లెమింగ్ వైదొలగడంతో ధోనీ ఆ జట్టుకు మెంటార్‌గా మారే అవకాశాలు ఉన్నాయని వార్తలు వస్తున్నాయి. వరుసగా మూడు సీజన్లలో ప్లేఆఫ్స్ చేరడంలో విఫలమైన సీఎస్‌కే, జట్టు పునర్‌వ్యవస్థీకరణపై దృష్టి సారించినట్టు తెలుస్తోంది.