మా దేశం సురక్షితం.. భారత జ‌ట్టు తప్పక వస్తుంది: బీసీబీ ప్రెసిడెంట్ తమీమ్ ఇక్బాల్

భారత క్రికెట్ జట్టుతో పరిమిత ఓవర్ల సిరీస్ నిర్వహించేందుకు బంగ్లాదేశ్ క్రికెట్ బోర్డు (బీసీబీ) తీవ్రంగా ప్రయత్నిస్తోంది. ఈ ఏడాది సెప్టెంబర్‌లో మూడు టీ20లు, మూడు వన్డేల సిరీస్‌కు ఆతిథ్యం ఇవ్వాలని ఆశిస్తున్నట్లు బీసీబీ అధ్యక్షుడు తమీమ్ ఇక్బాల్ తెలిపాడు. వాస్తవానికి ఈ పర్యటన 2025 ఆగస్టులో జరగాల్సి ఉండగా, ఇరు బోర్డుల మధ్య కుదిరిన ఒప్పందం మేరకు వాయిదా పడింది. ఇప్పుడు ఆ సిరీస్‌ను ముందుకు జరిపి ఈ సెప్టెంబర్‌లోనే నిర్వహించాలని బీసీబీ భావిస్తోంది.

బుధవారం జరిగిన మీడియా సమావేశంలో తమీమ్ ఇక్బాల్ ఈ విషయంపై స్పందించాడు. "భారత్‌తో సిరీస్‌పై ప్రస్తుతానికి నా వద్ద కచ్చితమైన సమాచారం లేదు. కానీ, మేము బీసీసీఐతో చర్చిస్తున్నాం. ఇరు బోర్డుల సభ్యుల మధ్య ఈ-మెయిల్స్ ద్వారా సంప్రదింపులు జరుగుతున్నాయి. ఈ సిరీస్‌ను సాకారం చేసేందుకు అన్ని విధాలా ప్రయత్నిస్తున్నాం" అని అన్నాడు. 

భారత్-బంగ్లాదేశ్ సిరీస్ అంటే అభిమానులు, క్రికెటర్లు, మీడియాలో ఎంతో ఉత్సాహం ఉంటుందని తమీమ్ పేర్కొన్నాడు. "బంగ్లాదేశ్ అత్యంత సురక్షితమైన దేశం. భారత జట్టు ఇక్కడికి వస్తుందని నేను గట్టిగా నమ్ముతున్నాను. మా వైపు నుంచి తీసుకోవాల్సిన అన్ని చర్యలు తీసుకుంటున్నాం" అని భరోసా ఇచ్చాడు.

అయితే, ఈ సిరీస్ జరిగితే టీమిండియా షెడ్యూల్‌లో మార్పులు తప్పకపోవచ్చు. ఇప్పటికే ఖరారైన షెడ్యూల్ ప్రకారం భారత జట్టు సెప్టెంబర్‌లో స్వదేశంలో ఆఫ్ఘ‌నిస్థాన్‌తో మూడు టీ20ల సిరీస్ ఆడాల్సి ఉంది. ఒకవేళ బంగ్లాదేశ్ పర్యటన ఖరారైతే, ఆఫ్ఘ‌న్ సిరీస్ వాయిదా పడే అవకాశం ఉంది. దీనికి తోడు టీమిండియా ఆగస్టులో శ్రీలంకలో రెండు టెస్టుల సిరీస్ ఆడనుంది. ఆ తర్వాత సెప్టెంబర్ 24 నుంచి జపాన్‌లో ప్రారంభమయ్యే ఆసియా క్రీడల్లో కూడా పాల్గొనాల్సి ఉంది.

ఈ క్రమంలోనే బీసీసీఐని ఒప్పించేందుకు తాను తీవ్రంగా కృషి చేస్తున్నట్లు తమీమ్ తెలిపాడు. "బీసీబీ అధ్యక్షుడిగా నాకు కొన్ని పరిమితులు ఉంటాయి. వాటిని నేను దాటకూడదు. కానీ, నా పరిధిలో సాధ్యమైనంత వరకు ప్రయత్నిస్తున్నాను. ఈ సిరీస్ జరిగితే కలిగే ప్రయోజనాల గురించి వారికి వివరిస్తున్నాను" అని చెప్పుకొచ్చాడు. చివరిసారిగా భారత జట్టు 2022లో బంగ్లాదేశ్‌లో పర్యటించింది. ఆ పర్యటనలో జరిగిన వన్డే సిరీస్‌ను బంగ్లాదేశ్ 2-1తో గెలుచుకోగా, టెస్టు సిరీస్‌ను భారత్ 2-0తో క్లీన్‌స్వీప్ చేసింది.