పాకిస్థాన్‌లో ఘోర విషాదం.. బొగ్గు గని పేలుడులో 15 మంది మృతి

పాకిస్థాన్‌లో ఘోర ప్రమాదం జరిగింది. బలూచిస్థాన్ ప్రావిన్స్‌లోని సోరేంజ్ బొగ్గు క్షేత్రంలో ఉన్న ఒక ప్రైవేట్ బొగ్గు గనిలో మీథేన్ గ్యాస్ పేలడంతో కనీసం 15 మంది కార్మికులు మరణించారు. మరో 24 మందికి పైగా కార్మికులు శిథిలాల కింద చిక్కుకుపోయారు. ఈ దుర్ఘటన స్థానికంగా తీవ్ర విషాదాన్ని నింపింది. గల్లంతైన వారి కోసం సహాయక చర్యలు ముమ్మరంగా కొనసాగుతున్నాయి.

అధికారులు తెలిపిన వివరాల ప్రకారం.. ప్రమాదం జరిగిన సమయంలో భూమికి దాదాపు 4,000 అడుగుల లోతున 24 మంది కార్మికులు పనిచేస్తున్నారు. గనిలో మీథేన్ గ్యాస్ పేరుకుపోయి ఒక్కసారిగా భారీ పేలుడు సంభవించింది. దీంతో గనిలో మంటలు చెలరేగి పైకప్పు కూలిపోయింది. ఈ ప్రమాద ప్రభావం సమీపంలోని మరో గనిపై కూడా పడింది. ఫలితంగా అక్కడ పనిచేస్తున్న మరో 12 మంది కార్మికులు కూడా చిక్కుకుపోయారు.

ప్రమాద సమయంలో రెండు గనుల్లో కలిపి మొత్తం 36 మంది కార్మికులు ఉన్నారని చీఫ్ ఇన్‌స్పెక్టర్ ఆఫ్ మైన్స్ మహ్మద్ ఆతిఫ్ తెలిపారు. సమాచారం అందుకున్న వెంటనే మైన్స్ అండ్ మినరల్స్ డిపార్ట్‌మెంట్, ప్రావిన్షియల్ డిజాస్టర్ మేనేజ్‌మెంట్ అథారిటీ (పీడీఎంఏ) బృందాలు సహాయక చర్యలు ప్రారంభించాయి. గని లోపల ప్రమాదకర వాయువులు పేరుకుపోవడంతో సహాయక చర్యలకు ఆటంకం కలుగుతోందని, గల్లంతైన వారి కోసం గాలింపు కొనసాగుతోందని ఆయన వివరించారు.

పాకిస్థాన్‌ బొగ్గు గనుల్లో భద్రతా లోపాల కారణంగా ప్రమాదాలు జరగడం సాధారణమైపోయింది. గత మే నెలలో ఖైబర్ పఖ్తున్‌ఖ్వా ప్రావిన్స్‌లో జరిగిన రెండు వేర్వేరు గని ప్రమాదాల్లో ఇద్దరు కార్మికులు మరణించారు. గనుల్లో కార్మికులకు కనీస భద్రతా ప్రమాణాలు పాటించడం లేదని, ప్రభుత్వం తక్షణమే స్పందించి కార్మికుల ప్రాణాలను కాపాడాలని స్థానికులు, కార్మిక సంఘాలు తీవ్ర ఆందోళన వ్యక్తం చేస్తున్నాయి.