ట్రూత్ సోషల్‌లో ట్రంప్ AI ఫొటోల కలకలం.. 'ట్రంప్ 2028' నినాదం!

అమెరికా అధ్యక్షుడు డొనాల్డ్ ట్రంప్ తన సోషల్ మీడియా ప్లాట్‌ఫామ్ ‘ట్రూత్ సోషల్’ వేదికగా కృత్రిమ మేధ (AI) సాయంతో రూపొందించిన కొన్ని చిత్రాలను పోస్ట్ చేసి సంచలనం సృష్టించారు. అమెరికా సైనిక శక్తిని ప్రదర్శించడంతో పాటు, 'ట్రంప్ 2028' నినాదంతో ఆయన భవిష్యత్ రాజకీయ ఆకాంక్షలను ప్రతిబింబిస్తున్న ఈ ఫోటోలు ప్రస్తుతం సామాజిక మాధ్యమాల్లో వైరల్‌గా మారాయి.

ఇరాన్‌తో నెలకొన్న ఉద్రిక్తతల నేపథ్యంలో రూపొందించిన చిత్రాలు ఈ జాబితాలో ప్రధానంగా ఉన్నాయి. ‘గార్డియన్స్ ఆఫ్ ది వరల్డ్’ శీర్షికతో ఉన్న ఒక చిత్రంలో, ట్రంప్ వెనుక ఉన్న అమెరికన్ స్టెల్త్ ఫైటర్ జెట్‌లు ‘ఇరాన్’ అని రాసి ఉన్న లక్ష్యాలపై దాడులు చేస్తున్నట్లుగా ఉంది. ఇరాన్‌కు చెందిన ఖర్గ్ ఐలాండ్ ఆయిల్ టెర్మినల్‌పై దాడితో పాటు, ఒక ఇరానియన్ ఆయిల్ ట్యాంకర్‌ను స్వాధీనం చేసుకుని ‘ఇది ఇప్పుడు మా ఆయిల్ ట్యాంకర్!’ అనే వ్యాఖ్యతో ఉన్న చిత్రాలు నెటిజన్ల దృష్టిని ఆకర్షిస్తున్నాయి.

సైనిక నేపథ్య చిత్రాలతో పాటు ట్రంప్ కొన్ని రాజకీయ పోస్టర్లను సైతం పంచుకున్నారు. అమెరికా వ్యవస్థాపక పితామహులైన జార్జ్ వాషింగ్టన్, థామస్ జెఫర్సన్‌లతో కలిసి ఆయన నిలబడి ఉన్న చిత్రానికి ‘అమెరికా ఫస్ట్’ అనే నినాదాన్ని జోడించారు. మరికొన్ని పోస్టర్లలో ‘ట్రంప్ 2028’, ‘ప్లాన్ ట్రస్టెడ్’ వంటి ట్యాగ్‌లు స్పష్టంగా కనిపిస్తున్నాయి.

కాగా, 'ట్రంప్ 2028' నినాదంపై ప్రస్తుతం అమెరికాలో విస్తృత చర్చ నడుస్తోంది. అమెరికా రాజ్యాంగం ప్రకారం, ఏ వ్యక్తి అయినా రెండు పర్యాయాలకు మించి అధ్యక్ష పదవిని చేపట్టడానికి వీల్లేదు. ఈ నిబంధనను సవరించాలంటే రాజ్యాంగ సవరణ అనివార్యం. దీనికోసం కాంగ్రెస్ ఉభయ సభల్లో మూడింట రెండొంతుల మెజారిటీతో పాటు, మొత్తం 50 రాష్ట్రాల్లో కనీసం 38 రాష్ట్రాల ఆమోదం తప్పనిసరి. ఇది అత్యంత సంక్లిష్టమైన ప్రక్రియ కావడం గమనార్హం.