అల్లుడు భద్రంతో కలిసి మెగాస్టార్ చిరంజీవిని కలిసిన సోము వీర్రాజు

మెగాస్టార్ చిరంజీవిని ఆంధ్రప్రదేశ్‌ బీజేపీ నేత, ఎమ్మెల్సీ సోము వీర్రాజు శుక్రవారం మర్యాదపూర్వకంగా కలిశారు. చిరంజీవి కథానాయకుడిగా బాబీ కొల్లి దర్శకత్వంలో రూపొందుతున్న 'మెగా 158' చిత్రంలో తన అల్లుడు, ప్రముఖ హాస్యనటుడు డాక్టర్ భద్రంకు మంచి పాత్రతో అవకాశం కల్పించినందుకు ఆయన చిరంజీవికి ప్రత్యేకంగా కృతజ్ఞతలు తెలిపారు. ఈ భేటీకి సంబంధించిన వివరాలను, ఫోటోను సోము వీర్రాజు సామాజిక మాధ్యమం 'ఎక్స్' వేదికగా పంచుకున్నారు.

"మెగాస్టార్ చిరంజీవి గారు, డైరెక్టర్ బాబీ గారి దర్శకత్వంలో తెరకెక్కుతున్న 'మెగా 158' సినిమాలో మా అల్లుడు డాక్టర్ భద్రం గారికి మంచి పాత్ర ఇచ్చినందుకు చిరంజీవి గారిని వ్యక్తిగతంగా కలిసి హృదయపూర్వక కృతజ్ఞతలు తెలియజేశాను. కళను, కళాకారులను ప్రోత్సహించడంలో చిరంజీవి గారు ఎందరికో ఆదర్శంగా నిలుస్తారు" అని సోము వీర్రాజు తన పోస్ట్‌లో పేర్కొన్నారు.

ఇక 'మెగా 158' సినిమా విషయానికొస్తే, బ్లాక్‌బస్టర్ హిట్ 'వాల్తేరు వీరయ్య' తర్వాత చిరంజీవి, డైరెక్టర్ బాబీ కొల్లి కాంబినేషన్‌లో వస్తున్న చిత్రమిది. కేవీఎన్ ప్రొడక్షన్స్ నిర్మిస్తున్న ఈ హై-వోల్టేజ్ యాక్షన్ ఎంటర్‌టైనర్ షూటింగ్ ప్రస్తుతం శరవేగంగా జరుగుతోంది. ఈ సినిమాలో అనస్వర రాజన్ నటిస్తుండగా, మలయాళ సూపర్ స్టార్ మోహన్‌లాల్ ఒక ప్రత్యేక పాత్రలో కనిపించనున్నట్లు ప్రచారం జరుగుతోంది. ఈ చిత్రానికి తమన్ సంగీతం అందిస్తున్నారు.