ధర ఎక్కువైనా తగ్గని క్రేజ్.. భారత్‌లో ఫోల్డబుల్ ఫోన్ల జోరు

భారత స్మార్ట్‌ఫోన్ మార్కెట్‌లో ఫోల్డబుల్ ఫోన్ల శకం వేగంగా విస్తరిస్తోంది. రాబోయే రెండేళ్లలో ఈ విభాగం భారీ వృద్ధిని నమోదు చేయనుందని తాజా నివేదికలు స్పష్టం చేస్తున్నాయి. 2026 చివరి నాటికి భారతదేశంలో ఫోల్డబుల్ స్మార్ట్‌ఫోన్‌ల అమ్మకాలు 30 లక్షల యూనిట్లను దాటుతాయని ప్రముఖ రీసెర్చ్ సంస్థ 'కౌంటర్‌పాయింట్ రీసెర్చ్' నేడు విడుదల చేసిన నివేదికలో అంచనా వేసింది. 2019 నుంచి 2026 మధ్య కాలంలో ఈ మార్కెట్ ఏటా సగటున 80 శాతం వృద్ధి రేటును నమోదు చేస్తుందని పేర్కొంది.

సాధారణ స్మార్ట్‌ఫోన్ల ధరలు డీ-ర్యామ్, న్యాండ్ ఫ్లాష్ మెమరీ వంటి కీలక విడిభాగాల ధరల పెరుగుదలతో అధికమవుతున్నప్పటికీ, ఫోల్డబుల్ ఫోన్ల డిమాండ్ మాత్రం స్థిరంగా కొనసాగుతుందని నివేదిక తెలిపింది. ముఖ్యంగా ప్రీమియం సెగ్మెంట్ వినియోగదారులు ధర కంటే కొత్తరకం డిజైన్లు, ఉత్పాదకత, మెరుగైన యూజర్ అనుభవానికి అధిక ప్రాధాన్యత ఇస్తున్నారు. సులభమైన ఫైనాన్సింగ్, ఆకర్షణీయమైన ఈఎంఐ పథకాలు కూడా ఈ ఖరీదైన ఫోన్లను కొనుగోలుదారులకు మరింత అందుబాటులోకి తెస్తున్నాయి.

మార్కెట్‌లో శాంసంగ్ ఆధిపత్యం
భారత ఫోల్డబుల్ మార్కెట్‌లో దక్షిణ కొరియా టెక్ దిగ్గజం శాంసంగ్ తన ఆధిపత్యాన్ని కొనసాగిస్తోందని కౌంటర్‌పాయింట్ సీనియర్ రీసెర్చ్ అనలిస్ట్ ప్రచిర్ సింగ్ తెలిపారు. ఈ రంగంలోకి మొదటగా అడుగుపెట్టడం, నిరంతర ఆవిష్కరణలు, వినియోగదారుల నమ్మకాన్ని చూరగొనడం వంటి అంశాలు శాంసంగ్‌కు కలిసొచ్చాయని ఆయన వివరించారు. 2026 నాటికి భారత ఫోల్డబుల్ స్మార్ట్‌ఫోన్ షిప్‌మెంట్లలో దాదాపు 89 శాతం వాటాను శాంసంగ్ కైవసం చేసుకుంటుందని అంచనా వేశారు. ఎనిమిదో తరం గెలాక్సీ 'జెడ్‌' సిరీస్‌తో పాటు కంపెనీకి ఉన్న నమ్మకమైన కస్టమర్ బేస్ ఇందుకు దోహదం చేస్తుందని పేర్కొన్నారు.

అధిక ధర సవాలు.. భవిష్యత్తులో వృద్ధి
అధిక ధరల కారణంగా ఫోల్డబుల్స్ రాబోయే కొన్నేళ్లపాటు ఒక 'నిచ్' (పరిమిత) మార్కెట్‌గానే కొనసాగుతాయని రీసెర్చ్ డైరెక్టర్ తరుణ్ పాఠక్ అభిప్రాయపడ్డారు. 2026లో ఫోల్డబుల్ ఫోన్ సగటు అమ్మకం ధర సుమారు రూ. 1.72 లక్షలు ఉంటుందని, ఇది సాధారణ స్మార్ట్‌ఫోన్ సగటు ధర కంటే ఐదు రెట్లు ఎక్కువని నివేదిక వెల్లడించింది. అయినప్పటికీ మన్నిక, తేలికైన డిజైన్లు, మెరుగైన బ్యాటరీ లైఫ్ వంటి అంశాల్లో వస్తున్న మార్పులు ఈ ఫోన్లను రోజువారీ వినియోగానికి మరింత ఆచరణాత్మకంగా మారుస్తాయని ఆయన తెలిపారు. 

2026 నాటికి మొత్తం ఫోల్డబుల్ షిప్‌మెంట్లలో మూడింట రెండొంతుల వాటా బుక్-టైప్ ఫోల్డబుల్స్‌దే ఉంటుందని, వాటి పెద్ద డిస్‌ప్లేలు, ఉత్పాదకత ఫీచర్లే ఇందుకు కారణమని అంచనా వేశారు. మొత్తంమీద ఫోల్డబుల్స్ తక్షణమే అందరికీ అందుబాటులోకి రాకపోయినా, భారత ప్రీమియం స్మార్ట్‌ఫోన్ మార్కెట్ దీర్ఘకాలిక వృద్ధిలో ఇవి కీలక పాత్ర పోషించనున్నాయని నివేదిక స్పష్టం చేసింది.