ఫిల్లింగులు, ఇంప్లాంట్లకు గుడ్‌బై.. దంతాలను సృష్టించే సరికొత్త టెక్నాలజీ!

పుచ్చిపోయిన పళ్లకు ఫిల్లింగులు, ఊడిపోయిన పళ్ల స్థానంలో ఇంప్లాంట్లు పెట్టుకోవడం మనకు తెలిసిందే. అయితే, ఈ పద్ధతులకు త్వరలో కాలం చెల్లనున్నాయని, దంతాలను సహజంగానే పునరుత్పత్తి చేసే లేదా మరమ్మతు చేసే సరికొత్త సాంకేతికతపై శాస్త్రవేత్తలు ముమ్మరంగా పరిశోధనలు చేస్తున్నారు. ఈ ప్రయోగాలు విజయవంతమైతే దంత వైద్య రంగంలో ఇదొక విప్లవంగా మారనుంది.

ప్రస్తుతం మనం వాడే ఫిల్లింగులు 5 నుంచి 20 ఏళ్లు, ఇంప్లాంట్లు సుమారు 15 ఏళ్ల వరకు మాత్రమే పనిచేస్తాయి. వీటికి తరచూ మరమ్మతులు చేయించుకోవాల్సి వస్తుంది. ఈ నేపథ్యంలో, జీవశాస్త్ర పద్ధతుల ద్వారా శాశ్వత పరిష్కారం కనుగొనే దిశగా శాస్త్రవేత్తలు పనిచేస్తున్నారు. కొన్ని పరిశోధనల్లో, దంతాలు తమను తాము బాగుచేసుకునేలా ప్రొటీన్లను ఉపయోగించి చిన్నచిన్న పుచ్చులను సహజంగా పూడ్చే ప్రయత్నాలు చేస్తున్నారు.

మరికొందరు శాస్త్రవేత్తలు స్టెమ్ సెల్స్‌తో ప్రయోగశాలలో 'టూత్ ఆర్గానాయిడ్స్' (దంత అవయవ నమూనాలు) సృష్టించారు. ఇవి దంతాలపై ఉండే ఎనామిల్‌ను ఉత్పత్తి చేసే కణాలను తయారుచేస్తున్నాయి. వీటిని 'సజీవ ఫిల్లింగుల' రూపంలో వాడొచ్చని భావిస్తున్నారు. ఇక మరికొందరు ఒక అడుగు ముందుకేసి, మానవ చిగుళ్ల కణాలు, జంతువుల దంత కణాలతో పూర్తిస్థాయి దంతాలను సృష్టించే పనిలో ఉన్నారు. బీబీసీ ఫ్యూచర్ కథనం ప్రకారం, పందులపై చేసిన ప్రయోగాల్లో మానవ కణాలతో దంతం లాంటి నిర్మాణాలు ఏర్పడ్డాయి.

ప్రస్తుతానికి ఈ పరిశోధనలన్నీ ప్రాథమిక దశలోనే ఉన్నాయి. జంతువులపై ప్రయోగాలు సత్ఫలితాలనిస్తున్నా, మనుషులపై పరీక్షలు నిర్వహించడానికి ఇంకా చాలా సంవత్సరాలు పట్టొచ్చని నిపుణులు చెబుతున్నారు. ఏదేమైనా, భవిష్యత్తులో దంత సమస్యలకు శాశ్వత, సురక్షితమైన పరిష్కారాలు అందుబాటులోకి వస్తాయని శాస్త్రవేత్తలు ఆశాభావం వ్యక్తం చేస్తున్నారు.