ఇరాన్‌తో అమెరికా అణు చర్చలకు నెతన్యాహు మద్దతు.. అమెరికా రక్షణ సాయాన్ని 'జీరో'కు తగ్గిస్తామంటూ కీలక వ్యాఖ్యలు!

గల్ఫ్ ప్రాంతంలో అమెరికా-ఇరాన్ దేశాల మధ్య భీకర దాడులు జరుగుతున్న వేళ, ఇజ్రాయెల్ ప్రధానమంత్రి బెంజమిన్ నెతన్యాహు ఆసక్తికర వ్యాఖ్యలు చేశారు. ఇరాన్‌తో సరికొత్త అణు ఒప్పందాన్ని కుదుర్చుకోవడానికి అమెరికా అధ్యక్షుడు డొనాల్డ్ ట్రంప్ జరుపుతున్న చర్చల ప్రయత్నాలకు ఆయన పూర్తి మద్దతు ప్రకటించారు. అదే సమయంలో, ఇజ్రాయెల్ ఇకపై తనను తాను రక్షించుకునే విషయంలో మరింత స్వయంసమృద్ది సాధిస్తోందని, భవిష్యత్తులో అమెరికా నుండి వచ్చే మిలిటరీ ఆర్థిక సహాయాన్ని పూర్తిగా 'సున్నా'కు తగ్గించుకునే సత్తా తమకు ఉందని స్పష్టం చేశారు.

ఎన్‌బీసీ న్యూస్ ‘మీట్ ద ప్రెస్’ కార్యక్రమంలో నెతన్యాహు మాట్లాడుతూ.. ఇరాన్ అణు కార్యక్రమంపై దౌత్యపరమైన చర్చల ద్వారా ఒక ముగింపునకు రావాలని అధ్యక్షుడు ట్రంప్ గట్టిగా భావిస్తున్నారని తెలిపారు. ఒకవేళ ఇరాన్ తన పాత బుద్ధిని ప్రదర్శించి, ఇచ్చిన హామీలను ఉల్లంఘిస్తే మాత్రం.. ఆ దేశంపై సైనిక శక్తిని ఉపయోగించడానికి కూడా ట్రంప్ ఏమాత్రం వెనుకాడరని నెతన్యాహు హెచ్చరించారు. "సాధారణంగా ఇరాన్ దేశం ఏదైనా ఒప్పందం చేసుకున్న కొన్ని గంటలకో, నిమిషాలకో దాన్ని ఉల్లంఘిస్తుంది. అయినప్పటికీ ట్రంప్ చర్చల రూపంలో ఇస్తున్న ఈ అవకాశాన్ని మనం స్వాగతించాలి" అని నెతన్యాహు పేర్కొన్నారు.

‘పర్ఫెక్ట్ డీల్’ కుదిరిన గంటలోనే ఇరాన్ ఘాతుకం: ట్రంప్
ఇదే కార్యక్రమం కోసం ఇచ్చిన మరో ఇంటర్వ్యూలో డొనాల్డ్ ట్రంప్ మాట్లాడుతూ ఇరాన్ వైఖరిపై తీవ్ర అసంతృప్తి వ్యక్తం చేశారు. నిన్ననే (శనివారం) ఇరాన్ తమతో ఒక అద్భుతమైన ఒప్పందానికి (పర్ఫెక్ట్ డీల్') అంగీకరించిందని ఆయన వెల్లడించారు. "ఇకపై ఎలాంటి అణు ప్రయోగాలు చేయబోమని, అన్నింటికీ సిద్ధమేనని ఇరాన్ ప్రతినిధులు ఒప్పందంపై సంతకం చేసి రూమ్ దాటి వెళ్లారు. కానీ అలా వెళ్లిన గంటలోపే హర్మూజ్ జలసంధిలో ఒక వాణిజ్య నౌకపైకి డ్రోన్ దాడికి తెగబడ్డారు" అని ట్రంప్ ఆరోపించారు. ఈ కారణంగానే తాము రాత్రికి రాత్రే ఇరాన్‌పై వైమానిక దాడులు ప్రారంభించాల్సి వచ్చిందని, అయితే హర్మూజ్ జలసంధి ప్రస్తుతం సురక్షితంగా, తెరిచే ఉందని ట్రంప్ స్పష్టం చేశారు.

అమెరికా రక్షణ సాయంపై నెతన్యాహు కీలక వ్యాఖ్యలు
ఇరాన్ అణు, క్షిపణి ముప్పుల నుండి పశ్చిమ దేశాలను, ఇజ్రాయెల్‌ను రక్షించడంలో అమెరికాతో ఉన్న సైనిక భాగస్వామ్యానికి తాము ఎల్లప్పుడూ కృతజ్ఞులమై ఉంటామని నెతన్యాహు అన్నారు. బిల్ క్లింటన్, బరాక్ ఒబామా, ట్రంప్ అధ్యక్ష కాలాల్లో కుదిరిన రక్షణ ఒప్పందాలను ప్రస్తావిస్తూ.. "ఇజ్రాయెల్ ఇప్పుడు స్వయం సమృద్ధి సాధించే వయసుకు వచ్చింది. భవిష్యత్తులో అమెరికా ఇచ్చే సైనిక సాయాన్ని క్రమంగా తగ్గించుకుంటూ సున్నాకు తీసుకురాగల సామర్థ్యం మాకుంది" అని నెతన్యాహు వ్యాఖ్యానించారు.

సెనేటర్ లిండ్సే గ్రాహం మృతికి సంతాపం
ఇజ్రాయెల్‌కు అమెరికా సెనేట్‌లో అతిపెద్ద రక్షణ కవచంగా నిలిచిన ప్రముఖ రిపబ్లికన్ సెనేటర్ లిండ్సే గ్రాహం శనివారం రాత్రి గుండెపోటుతో మరణించారు. ఆయన మృతి పట్ల నెతన్యాహు సంతాపం వ్యక్తం చేశారు. గతంలో ఇజ్రాయెల్ క్షిపణి రక్షణ వ్యవస్థల కోసం తాము అడిగిన దానికంటే ఎక్కువ నిధులను అమెరికా ప్రభుత్వం మంజూరు చేసేలా లిండ్సే గ్రాహం పోరాడారని గుర్తుచేసుకున్నారు. ఇజ్రాయెల్‌కు సైనిక సాయం చేయడం అంటే అది అమెరికా జాతీయ భద్రతను కాపాడుకోవడమేనని గ్రాహం బలంగా నమ్మేవారని, ఆయన మరణం ఇజ్రాయెల్‌కు తీరని లోటని నెతన్యాహు ఆవేదన వ్యక్తం చేశారు.