పశ్చిమాసియాలో ముదిరిన యుద్ధ జ్వాలలు: ఇరాన్‌పై అమెరికా ‘పవర్‌ఫుల్’ వైమానిక దాడులు!

అంతర్జాతీయ జలమార్గమైన హర్మూజ్ జలసంధి గుండా ప్రయాణిస్తున్న మూడు వాణిజ్య నౌకలపై ఇరాన్ దాడులకు తెగబడటంతో.. అమెరికా సైన్యం అత్యంత శక్తిమంతమైన ప్రతిదాడిని ప్రారంభించింది. ఇరాన్ భూభాగంలోని వ్యూహాత్మక సైనిక లక్ష్యాలపై అమెరికా సెంట్రల్ కమాండ్ బలగాలు వైమానిక దాడులతో విరుచుకుపడుతున్నాయి. పౌరులతో ప్రయాణిస్తున్న వాణిజ్య నౌకలను లక్ష్యంగా చేసుకున్నందుకు ఇరాన్ భారీ మూల్యం చెల్లించుకునేలా ఈ 'పవర్‌ఫుల్ స్ట్రైక్స్' ప్రారంభించినట్లు అమెరికా మిలిటరీ సామాజిక మాధ్యమం 'ఎక్స్' ద్వారా అధికారికంగా ప్రకటించింది.

తుర్కియేలో జరుగుతున్న నాటో శిఖరాగ్ర సదస్సులో పాల్గొంటున్న అమెరికా అధ్యక్షుడు డొనాల్డ్ ట్రంప్ ఈ దాడి ప్రణాళికకు తక్షణ ఆమోదం తెలిపినట్లు సమాచారం. అమెరికా వైమానిక దాడుల ధాటికి దక్షిణ ఇరాన్‌లోని రేవు పట్టణాలైన బందర్ అబ్బాస్, సిరిక్, క్వేష్మ్ దీవుల పరిసర ప్రాంతాల్లో భారీ పేలుళ్లు సంభవించినట్లు ఇరాన్ ప్రభుత్వ అధికారిక మీడియా సంస్థలు ధ్రువీకరించాయి. ఈ దాడుల్లో ఇరాన్‌ వాయు రక్షణ వ్యవస్థలు, కోస్టల్ రాడార్ సైట్లు, ఉపరితలం నుంచి గగనతలంలోకి దూసుకెళ్లే క్షిపణి కేంద్రాలు, డ్రోన్ లాంచ్ ప్యాడ్లతో పాటు ఇస్లామిక్ రివల్యూషనరీ గార్డ్ కార్ప్స్ (ఐఆర్‌జీసీ)కి చెందిన 60కి పైగా యుద్ధ పడవలను అమెరికా క్షిపణులు ధ్వంసం చేశాయి.

లైసెన్స్ రద్దు - దెబ్బతిన్న తాత్కాలిక కాల్పుల విరమణ
యూకే మారిటైమ్ ట్రేడ్ ఆపరేషన్స్ (యూకేఎంటీవో) నివేదిక ప్రకారం.. ఇరాన్ దళాలు ఒమన్ తీరానికి సమీపంలో సౌదీ అరేబియాకు చెందిన ముడి చమురు ట్యాంకర్, ఖతార్‌కు చెందిన ద్రవీకృత సహజ వాయువు (ఎల్ఎన్‌జీ) ట్యాంకర్‌ సహా మూడు వాణిజ్య నౌకలపై డ్రోన్లు, గుర్తుతెలియని క్షిపణులతో దాడులు చేశాయి. అయితే ఈ ఘటనల్లో ఎవరికీ ప్రాణనష్టం జరగలేదు. ఈ దాడుల నేపథ్యంలో అమెరికా తక్షణమే స్పందించి, జూన్ నెలలో కుదిరిన తాత్కాలిక ఒప్పందం ప్రకారం ఇరాన్‌కు ఇచ్చిన చమురు విక్రయాల ప్రత్యేక లైసెన్స్‌ను (ఆంక్షల మినహాయింపు) రద్దు చేసింది. ఇరాన్ చర్యలు కాల్పుల విరమణ ఒప్పందాన్ని స్పష్టంగా ఉల్లంఘించడమేనని, శాంతి చర్చల మధ్య ఇలాంటి దాడులు ఏమాత్రం ఆమోదయోగ్యం కాదని అమెరికా రక్షణ శాఖ తీవ్రంగా హెచ్చరించింది.