ఢిల్లీ గృహిణి దశ తిరిగింది.. అబుదాబి లాటరీలో రూ.65 కోట్ల జాక్‌పాట్!

ఢిల్లీకి చెందిన ఓ సాధారణ గృహిణిని అదృష్టం వరించింది. అబుదాబిలో నిర్వహించిన ‘బిగ్ టికెట్’ లైవ్ డ్రాలో ఆమె ఏకంగా 25 మిలియన్ దిర్హమ్‌ల (భారత కరెన్సీలో సుమారు రూ. 65 కోట్లు) భారీ జాక్‌పాట్‌ను గెలుచుకున్నారు. ఈ మెగా ప్రైజ్ విజేతను ఢిల్లీకి చెందిన 42 ఏళ్ల కనికా అరోరాగా నిర్వాహకులు గుర్తించారు.

వివరాల్లోకి వెళ్తే.. కనికా భర్త గత నాలుగేళ్లుగా క్రమం తప్పకుండా ‘బిగ్ టికెట్’ డ్రాలో టికెట్లు కొనుగోలు చేస్తున్నారు. ఈ క్రమంలోనే జూన్ 30న జరిగిన డ్రా కోసం తన భార్య కనికా పేరు మీద ఆన్‌లైన్‌లో 476107 నంబరు గల టికెట్‌ను ఆయన తీసుకున్నారు. అనూహ్యంగా ఈ టికెట్‌కే బంపర్ బహుమతి వరించడంతో ఆ కుటుంబం ఆనందంలో మునిగిపోయింది.

తాను రూ. 65 కోట్లు గెలిచానన్న వార్తను మొదట నమ్మలేకపోయానని కనికా అరోరా ఆశ్చర్యం వ్యక్తం చేశారు. ఈ సొమ్ముతో కొత్త ఇల్లు కొనుగోలు చేయడంతో పాటు, తమ ఐదేళ్ల కుమార్తె ఉన్నత చదువులు, భవిష్యత్తు అవసరాల కోసం కొంత మొత్తాన్ని కేటాయిస్తామని ఆమె తెలిపారు. అలాగే, ఎప్పటి నుంచో తమకున్న డిస్నీల్యాండ్ సందర్శన కలని కూడా ఈ నిధులతో నెరవేర్చుకుంటామని ఆ కుటుంబం సంతోషంగా వెల్లడించింది. యూఏఈలో నిర్వహించే ‘బిగ్ టికెట్’ డ్రాకు విశేష ఆదరణ ఉంది. ప్రతినెలా జరిగే ఈ లక్కీ డ్రాలో వేలాది మంది ప్రవాసులు పాల్గొని తమ అదృష్టాన్ని పరీక్షించుకుంటూ ఉంటారు.