సింధు జలాల ఒప్పందంపై వెనక్కి తగ్గేది లేదు: పాకిస్థాన్కు భారత్ స్పష్టం
- ఉగ్రవాదానికి మద్దతు ఆపే వరకు ఒప్పందం నిలిపివేత కొనసాగుతుందని వెల్లడి
- 2025 ఏప్రిల్లో జరిగిన పహల్గామ్ ఉగ్రదాడి తర్వాత భారత్ నిర్ణయం
- ఈ ఒప్పందంపై పాకిస్థాన్ ఇటీవల చేసిన వ్యాఖ్యలను తోసిపుచ్చిన భారత విదేశాంగ శాఖ
విదేశాంగ శాఖ అధికార ప్రతినిధి రణ్ధీర్ జైస్వాల్ మీడియా సమావేశంలో ఈ వివరాలను వెల్లడించారు. ఇటీవల ఇస్లామాబాద్లో సింధు జలాల ఒప్పందంపై పాకిస్థాన్ అంతర్జాతీయ సదస్సు నిర్వహించి, భారత్కు వ్యతిరేకంగా వ్యాఖ్యలు చేసిన నేపథ్యంలో ఆయన స్పందించారు. ఒప్పందం ఇప్పటికీ అమలులోనే ఉందని, నీటిని ఆయుధంగా మార్చవద్దంటూ పాక్ ఉప ప్రధాని ఇషాక్ దార్ సహా ఇతర మంత్రులు చేసిన హెచ్చరికలను ఆయన తిప్పికొట్టారు. తన అంతర్గత సమస్యల నుంచి ప్రజల దృష్టిని మళ్లించేందుకే పాకిస్థాన్ ఇలాంటి నిరాధార వ్యాఖ్యలు చేస్తోందని ఆయన విమర్శించారు.
2025 ఏప్రిల్లో జమ్ముకశ్మీర్లోని పహల్గామ్లో జరిగిన ఉగ్రదాడిలో 26 మంది ప్రాణాలు కోల్పోయిన సంగతి తెలిసిందే. ఈ ఘటన అనంతరం, పాక్ ప్రేరేపిత ఉగ్రవాదానికి నిరసనగా భారత్ ఈ ఒప్పందాన్ని నిలిపివేసింది. ఒప్పందానికి ప్రతిపాదిక అయిన స్నేహపూర్వక వాతావరణాన్ని, సద్భావన సూత్రాలను పాకిస్థాన్ నిరంతరం ఉల్లంఘిస్తోందని భారత్ ఆరోపిస్తోంది.
ప్రపంచ బ్యాంకు మధ్యవర్తిత్వంతో 1960లో కుదిరిన ఈ ఒప్పందం ప్రకారం తూర్పు నదులైన రావి, బియాస్, సట్లేజ్లపై భారత్కు, పశ్చిమ నదులైన సింధు, జీలం, చీనాబ్లపై పాకిస్థాన్కు ప్రధాన హక్కులు లభించాయి. ప్రస్తుతం నదీ జలాల ప్రవాహంలో ఎలాంటి మార్పులు లేనప్పటికీ, ఇరు దేశాల మధ్య దౌత్యపరమైన ఉద్రిక్తతలు కొనసాగుతున్నాయి. ఈ వివాదంపై అంతర్జాతీయ స్థాయిలో చట్టపరమైన చర్యలు తీసుకుంటామని పాకిస్థాన్ హెచ్చరిస్తోంది.
