నన్ను ఇరికిస్తున్నారు.. థర్డ్ డిగ్రీ వాడకుండా చూడండి: కోర్టుకు సీఐ నాగరాజు లేఖ
- నాగరాజును 8 రోజుల పాటు సిట్ కస్టడీకి ఇచ్చిన కోర్టు
- తప్పుడు ఆధారాలు సృష్టించి తనను అన్యాయంగా ఇరికిస్తున్నారంటూ కోర్టుకు నాగరాజు లేఖ
- తనను శారీరకంగా, మానసికంగా వేధించకుండా ఆదేశాలు ఇవ్వాలని విన్నపం
విజయవాడకు చెందిన గాదె సాయికృష్ణ మిస్సింగ్ (కస్టోడియల్ మరణం) వ్యవహారంలో ప్రధాన నిందితుడిగా ఉన్న కృష్ణలంక సీఐ నాగరాజు కేసులో ఒక అనూహ్య పరిణామం చోటు చేసుకుంది. ఈ కేసును దర్యాప్తు చేస్తున్న సిట్ అధికారులకు విజయవాడ కోర్టు నాగరాజును 8 రోజుల పాటు పోలీస్ కస్టడీకి అనుమతించిన నేపథ్యంలో.. ఆయన న్యాయస్థానానికి ఒక సంచలన లేఖ రాశారు. సాయికృష్ణ కేసుతో తనకు ఎలాంటి సంబంధం లేదని, తాను పూర్తిగా నిర్దోషినని, తనపై వచ్చిన ఆరోపణలన్నీ అవాస్తవాలని ఆ లేఖలో పేర్కొన్నారు.
సిట్ అధికారులు కావాలనే తప్పుడు ఆధారాలను సృష్టించి ఈ కేసులో తనను అన్యాయంగా ఇరికిస్తున్నారని సీఐ నాగరాజు ఆరోపించారు. ఎనిమిది రోజుల కస్టడీ విచారణ సమయంలో అధికారులు తనపై థర్డ్ డిగ్రీ ఉపయోగించకుండా, శారీరకంగా, మానసికంగా వేధించకుండా తగిన ఆదేశాలు ఇవ్వాలని ఆయన కోర్టును వేడుకున్నారు. అంతేకాకుండా, సిట్ అధికారులు జరిపే విచారణ ప్రక్రియ అంతా చట్ట ప్రకారం తన న్యాయవాదుల సమక్షంలోనే జరిగేలా చూడాలని లేఖలో అభ్యర్థించారు.
