చమురు ధరల ఊరట.. భారీ లాభాల్లో స్టాక్ మార్కెట్లు

దేశీయ స్టాక్ మార్కెట్లు గురువారం భారీ లాభాలతో ముగిశాయి. అమెరికా, ఇరాన్ మధ్య వాణిజ్య చర్చల్లో సానుకూల సంకేతాలు వెలువడటంతో అంతర్జాతీయంగా ముడి చమురు ధరలు తగ్గడం మన మార్కెట్లకు కలిసొచ్చింది. దీంతో ఇన్వెస్టర్ల సెంటిమెంట్ బలపడి కొనుగోళ్లకు మొగ్గు చూపారు. ఫలితంగా, సెన్సెక్స్ 579.48 పాయింట్లు లాభపడి 77,502.12 వద్ద స్థిరపడగా, నిఫ్టీ 169.85 పాయింట్లు పెరిగి 24,175.70 వద్ద ముగిసింది.

ఈనాటి ర్యాలీలో టెక్నాలజీ షేర్లు కీలక పాత్ర పోషించాయి. ఇన్ఫోసిస్, టెక్ మహీంద్రా, టీసీఎస్ వంటి షేర్లు నిఫ్టీలో టాప్ గెయినర్లుగా నిలిచాయి. దీంతో నిఫ్టీ ఐటీ ఇండెక్స్ 2025 మే నెల తర్వాత ఒకే రోజులో అతిపెద్ద లాభాన్ని నమోదు చేసింది. 

బ్రాడర్ మార్కెట్లలోనూ కొనుగోళ్ల జోరు కనిపించింది. నిఫ్టీ మిడ్‌క్యాప్ 0.48 శాతం, స్మాల్‌క్యాప్ 1.25 శాతం మేర లాభపడ్డాయి. ఐటీతో పాటు ఆటో, కన్స్యూమర్ డ్యూరబుల్స్, రియాల్టీ రంగాల సూచీలు కూడా మంచి లాభాలను నమోదు చేశాయి.

టెక్నికల్‌గా చూస్తే, నిఫ్టీ రోజంతా స్థిరమైన కొనుగోళ్లతో 24,200 నిరోధక స్థాయి వైపు కదిలిందని నిపుణులు విశ్లేషిస్తున్నారు. ఈ స్థాయిని దాటితే కొనుగోళ్ల ట్రెండ్ మరింత బలపడి 24,400–24,450 స్థాయిల వరకు వెళ్లే అవకాశం ఉందని అంచనా వేస్తున్నారు. అదే సమయంలో, కిందవైపు 24,000 స్థాయి తక్షణ మద్దతుగా పనిచేస్తుందని పేర్కొన్నారు.

తగ్గుతున్న ఇంధన ధరలతో పాటు, ఆర్టిఫిషియల్ ఇంటెలిజెన్స్ (ఏఐ), రక్షణ సాంకేతికత, ఇంధన భద్రత వంటి కీలక రంగాల్లో భారత్-జపాన్ మధ్య కొత్త ఒప్పందాలు కుదరడం కూడా మార్కెట్ ఆశావాద దృక్పథానికి దోహదపడింది