హనీమూన్ హత్య కేసు: సుప్రీంకోర్టుకు రాజా రఘువంశీ కుటుంబం

రాజా రఘువంశీ హత్య కేసులో ప్రధాన నిందితురాలైన భార్య సోనమ్ రఘువంశీ బెయిల్ వ్యవహారం దేశ అత్యున్నత న్యాయస్థానానికి చేరనుంది. సోనమ్‌కు కింది కోర్టు మంజూరు చేసిన బెయిల్‌ను సవాల్ చేస్తూ మేఘాలయ ప్రభుత్వం దాఖలు చేసిన పిటిషన్‌ను మేఘాలయ హైకోర్టు తోసిపుచ్చింది. హైకోర్టు తీర్పు వెలువడిన మరుసటి రోజే బాధితుడు రాజా కుటుంబం ఈ వ్యవహారంపై స్పందించింది. సోనమ్ బెయిల్‌ను రద్దు చేయాలంటూ తాము త్వరలోనే సుప్రీంకోర్టును ఆశ్రయించనున్నట్లు స్పష్టం చేసింది.

ఈ సందర్భంగా రాజా రఘువంశీ పెద్దన్న విపిన్ రఘువంశీ మాట్లాడుతూ, హైకోర్టు తీర్పుపై అసంతృప్తి వ్యక్తం చేశారు. సోనమ్ బెయిల్ రద్దు కోరుతూ సుప్రీంకోర్టులో అప్పీల్ చేయడానికి అవసరమైన ప్రక్రియను త్వరలోనే ప్రారంభిస్తామన్నారు. ఈ కేసులో ప్రాసిక్యూషన్ తీరు సరిగ్గా లేదని, అందుకే తాము సొంతంగా ప్రైవేట్ లాయర్‌ను నియమించుకుని న్యాయం కోసం పోరాడతామని ఆయన ప్రకటించారు.  

 పోలీసుల వైఫల్యాన్ని ఎండగట్టిన హైకోర్టు 
మరోవైపు, సోనమ్ రఘువంశీ అరెస్ట్ ప్రక్రియలో మేఘాలయ పోలీసులు వ్యవహరించిన తీరుపై హైకోర్టు తీవ్ర ఆగ్రహం వ్యక్తం చేసింది. నిందితురాలి అరెస్ట్ కారణాలను సరిగ్గా వివరించకపోవడం పోలీసుల తీవ్ర లోపాన్ని సూచిస్తోందని కోర్టు పేర్కొంది. అరెస్ట్ చేసే ఏజెన్సీ కనీస ఆలోచన లేకుండా పనిచేసిందని, ఇది నిందితురాలి అరెస్ట్ ప్రాథమిక హక్కులను దెబ్బతీసిందని వ్యాఖ్యానించింది. ఈ చట్టపరమైన లోపం కారణంగానే ప్రాథమిక దశలో తనకు సరైన కారణాలు చెప్పలేదని వాదించడానికి నిందితురాలికి బలమైన అవకాశం దక్కిందని హైకోర్టు స్పష్టం చేసింది. రాజ్యాంగంలోని ఆర్టికల్ 22(1) తో పాటు భారతీయ నాగరిక్ సురక్ష సంహితలోని సెక్షన్ 47(1) నిబంధనలను ఇక్కడ ఉల్లంఘించారని కోర్టు గుర్తుచేసింది.

అసలేం జరిగిందంటే..
ఇండోర్‌ వ్యాపార కుటుంబానికి చెందిన రాజా రఘువంశీకి, సోనమ్‌కు గతేడాది మే 11న వివాహం జరిగింది. అనంతరం మే 20న వారు హనీమూన్ కోసం మేఘాలయ వెళ్లారు. మే 23న సోనమ్ అదృశ్యమవగా.. జూన్ 2న ఈస్ట్ ఖాసీ హిల్స్ జిల్లా సోహ్రా ప్రాంతంలోని ఒక జలపాతం లోయలో రాజా రఘువంశీ మృతదేహం లభ్యమైంది. భర్త హత్యకు కుట్ర పన్నిన ఆరోపణలపై సోనమ్‌ను జూన్ 9న ఉత్తరప్రదేశ్‌లోని ఘాజీపూర్‌లో అధికారులు అరెస్ట్ చేశారు. ఈ కేసులో సోనమ్‌తో పాటు ఆమె ప్రియుడు రాజ్ కుష్వాహా, అతడి ముగ్గురు స్నేహితులను కూడా పోలీసులు అరెస్ట్ చేశారు. సుమారు 10 నెలలకు పైగా షిల్లాంగ్ జిల్లా జైలులో జ్యుడీషియల్ కస్టడీలో ఉన్న సోనమ్‌కు ఏప్రిల్ 27న కింది కోర్టు బెయిల్ మంజూరు చేసింది. తాజాగా హైకోర్టు కూడా ఆ బెయిల్‌ను సమర్థించడంతో, రాజా కుటుంబం ఇప్పుడు సుప్రీంకోర్టు వైపు అడుగులు వేస్తోంది.