'డార్క్ ఫ్లీట్' నౌకల్లో కొత్త ప్రమాదం.. బయటపెట్టిన యూఎస్ కోస్ట్ గార్డ్

సముద్రంలో అక్రమంగా సంచరిస్తున్న 'ఘోస్ట్ షిప్స్' లేదా 'డార్క్ ఫ్లీట్' నౌకల ద్వారా సరికొత్త ముప్పు పొంచి ఉందని అమెరికా కోస్ట్ గార్డ్ సంచలన విషయాలను వెల్లడించింది. పాతబడిన ఈ నౌకల వల్ల భౌతిక ప్రమాదాలు తలెత్తుతాయని ఇప్పటికే తెలిసినప్పటికీ, తాజాగా వీటిలో తీవ్రమైన సైబర్ లోపాలు ఉన్నట్లు గుర్తించారు. ఇవి సముద్రంలో భారీ పేలుళ్లు లేదా చమురు లీకేజీల వంటి పెను విపత్తులకు దారితీయవచ్చని అధికారులు హెచ్చరించారు.

వాల్ స్ట్రీట్ జర్నల్ కథనం ప్రకారం, ఇటీవల యూఎస్ కోస్ట్ గార్డ్ సైబర్ బృందాలు కొన్ని అక్రమ నౌకలో తనిఖీలు నిర్వహించాయి. ఈ సందర్భంగా వాటిలో రిమోట్ యాక్సెస్ టూల్స్, మాల్‌వేర్‌తో కూడిన పైరేటెడ్ సాఫ్ట్‌వేర్, వ్యవస్థలను రిమోట్‌గా హైజాక్ చేసేందుకు వీలు కల్పించే సాంకేతిక లోపాలను గుర్తించారు. పాశ్చాత్య దేశాల ఆంక్షల నుంచి తప్పించుకోవడానికి రష్యా, ఇరాన్, వెనిజులా వంటి దేశాల నుంచి చమురు రవాణా చేసే ఈ నౌకలను 'డార్క్ ఫ్లీట్'గా వ్యవహరిస్తారు. ఇవి తరచూ తమ ట్రాకింగ్ వ్యవస్థలను ఆపివేసి, నకిలీ గుర్తింపులతో సముద్ర ప్రయాణాలు సాగిస్తుంటాయి.

ఈ పరిణామాలపై యూఎస్ కోస్ట్ గార్డ్ సైబర్ కమాండ్ హెడ్, రియర్ అడ్మిరల్ జాసన్ టామా మాట్లాడుతూ, 'ఈ నౌకల వల్ల భౌతిక ప్రమాదాలు జరిగే అవకాశాలు ఉన్నాయని మాకు కొన్నేళ్లుగా తెలుసు. అయితే, వాటిలో పొంచి ఉన్న సైబర్ ముప్పుల గురించి తనిఖీలు చేసే వరకు మాకు అవగాహన లేదు" అని పేర్కొన్నారు. కొన్ని నౌకల్లో ఎనీడెస్క్, టీమ్‌వ్యూయర్ వంటి రిమోట్ డెస్క్‌టాప్ ప్రోగ్రామ్‌లను గుర్తించామని, తమ అధికారులు నౌకలోకి ప్రవేశించగానే ఆపరేటర్లు రిమోట్‌గా డేటాను డిలీట్ చేసేందుకు ప్రయత్నించారని ఆయన వెల్లడించారు.

ఈ సైబర్ లోపాలను ఆసరాగా చేసుకుని హ్యాకర్లు నౌకల ఇంజిన్లు, నావిగేషన్ వ్యవస్థలను తమ ఆధీనంలోకి తీసుకునే ప్రమాదం ఉంది. దీనివల్ల నౌకలు నియంత్రణ కోల్పోయి భారీ ప్రమాదాలు జరిగే అవకాశం ఉంది. ఇటీవల బ్రిటన్ దళాలు ఒక రష్యన్ షాడో ట్యాంకర్‌ను స్వాధీనం చేసుకున్న నేపథ్యంలో ఈ నివేదిక అత్యంత ప్రాధాన్యత సంతరించుకుంది. ఈ అక్రమ నౌకల వల్ల పర్యావరణానికే కాకుండా, వాటిలో పనిచేసే సిబ్బంది ప్రాణాలకు కూడా తీవ్ర ముప్పు పొంచి ఉందని నిపుణులు ఆందోళన వ్యక్తం చేస్తున్నారు.