భారత్ లో అత్యంత సుదీర్ఘ రైలు ప్రయాణం ఇదే... 8 రాష్ట్రాల మీదుగా 3 మూడ్రోజుల జర్నీ!

భారత రైల్వే నెట్‌వర్క్‌లో వివేక్ ఎక్స్‌ప్రెస్‌కు ఒక ప్రత్యేక స్థానం ఉంది. దేశంలోనే అత్యంత సుదీర్ఘమైన రైలు మార్గంలో ప్రయాణించే ఘనత ఈ రైలు సొంతం. అసోంలోని దిబ్రూగఢ్‌లో ప్రారంభమై దేశపు దక్షిణ అంచున ఉన్న కన్యాకుమారి వరకు ఈ రైలు ప్రయాణిస్తుంది. ఈ ప్రయాణంలో రైలు సుమారు 4,188 కిలోమీటర్ల దూరం ప్రయాణిస్తుంది.

ఈ సుదీర్ఘ ప్రయాణానికి దాదాపు 74 నుంచి 75 గంటల సమయం పడుతుంది. అంటే, దాదాపు 3 పగళ్లు, 3 రాత్రులు ప్రయాణంలోనే గడపాల్సి ఉంటుంది. తన ప్రయాణ మార్గంలో ఆంధ్రప్రదేశ్, తమిళనాడు సహా 8 రాష్ట్రాల గుండా ఇది వెళుతుంది. గౌహతి, భువనేశ్వర్, విజయవాడ, చెన్నై వంటి ప్రధాన నగరాలతో పాటు మొత్తం 57 స్టేషన్లలో ఆగుతుంది.

అసోంలోని తేయాకు తోటల నుంచి తూర్పు తీర మైదానాలు, సముద్ర ప్రాంతాల మీదుగా సాగే ఈ ప్రయాణం.. భారతదేశంలోని భిన్న సంస్కృతులు, వాతావరణం, ప్రకృతి దృశ్యాలను కళ్లకు కట్టినట్టు చూపిస్తుంది. అందుకే రైల్వే ప్రియులకు, వ్లాగర్లకు ఈ ప్రయాణం ఎంతో ఇష్టం.

స్వామి వివేకానంద 150వ జయంతిని పురస్కరించుకుని 2011లో ఈ రైలును ప్రారంభించారు. దూరం, ప్రయాణ సమయం పరంగా భారత రైల్వేల్లో ఇప్పటికీ ఇదే రికార్డును కొనసాగిస్తోంది.