దేశీయ స్టాక్ మార్కెట్లు ఇవాళ‌ తీవ్ర ఒడిదుడుకుల మధ్య స్వల్ప లాభాలతో ముగిశాయి. రోజంతా నష్టాల్లో ట్రేడ్ అయిన సూచీలు.. చివరి గంటలో అనూహ్యంగా పుంజుకున్నాయి. ఆయిల్ అండ్‌ గ్యాస్, ఆటో రంగాల షేర్లలో కొనుగోళ్ల మద్దతుతో నష్టాలను చెరిపేసి లాభాల్లోకి మళ్లాయి.

ట్రేడింగ్ ముగిసే సమయానికి సెన్సెక్స్ 117.54 పాయింట్లు (0.16%) లాభపడి 75,318.39 వద్ద స్థిరపడింది. నిఫ్టీ 41 పాయింట్లు (0.17%) పెరిగి 23,659 వద్ద ముగిసింది. ట్రేడింగ్ సమయంలో సెన్సెక్స్ 74,529.41 కనిష్ఠ‌ స్థాయికి పడిపోయి, ఆ తర్వాత 75,406.18 గరిష్ఠ‌ స్థాయికి చేరింది. నిఫ్టీ కూడా 23,397.30 కనిష్టాన్ని తాకి, తిరిగి కోలుకుంది.

నిఫ్టీలో హిందాల్కో ఇండస్ట్రీస్, బజాజ్ ఆటో షేర్లు టాప్ గెయినర్లుగా నిలిచి మార్కెట్ రికవరీకి దోహదపడ్డాయి. రంగాల వారీగా చూస్తే నిఫ్టీ ఆటో, నిఫ్టీ ఆయిల్ అండ్‌ గ్యాస్ సూచీలు రాణించగా, నిఫ్టీ మీడియా, నిఫ్టీ ఎఫ్ఎంసీజీ సూచీలు నష్టపోయాయి. బ్రాడర్ మార్కెట్‌లో నిఫ్టీ మిడ్‌క్యాప్ 0.49% లాభపడగా, స్మాల్‌క్యాప్ 0.04% లాభంతో ఫ్లాట్‌గా ముగిసింది.